Naja P.-p inuit erinarsuummik assigiinngissutsimik akuersisumik ataatsimoortikkusuppai
Pan-Arctic Vision Issittumi nipilersortartunit peqataaffigineqartussaq Nuummi oktobarimi aaqqissuunneqassaaq.
Naja Parnuuna Vahl Olsen nipilersornerup silarsuaani Naja P-usoq, Katuami unammeqataanissaminut erinarsugassani qilanaartuusiissutigaa.
Naja P-p taallaq kammalaatini peqatigalugu ukiualuit matuma siorna taalliaraa.
- Inuit marluk naapeqatigiinniarnerat, paaseqatigiinniarneranni immikkut tamarmik eqqarsartariaasillit, immikkut tamarmik sinnattullit naapeqatiginniaraluarlutik kisianni aamma akueralugu assiginngissusertik, taanna oqarpoq.
Assigiinngissutsimik akuersineq nersorinninnermillu oqariartuuteqarneq inuusuttup erinarsortartup oqarnera naapertorlugu Pan-Arctic Visionimut tulluarpoq.
- Imaassinnasoq aamma kulturit assigiinngitsut marluk imaluunniit kulturit assigiinngitsut arlallit naapeqatigiinniarsarisut kisianni aamma akueralugu immikkuullarissuseqarlutik tamarmik taamaammat Pan-Arctic Visionimut tulluartissimallugu taanna, Naja Parnuuna Vahl Olsen oqarpoq.
Unamminermut ukioq manna peqataasussat qulingiluat qulakkeereerput. Unammeqataasussap kingulliup nassaarinissaa pilersaarutaavoq, unammisussat taamaalillutik quliussallutik.
Piareersaleruttortoq
Unammeqataanissaanullumi qaammat ataasiinnanngorpoq, tungaanullu piareersaatit imaaginnavipput.
- Eqqarsaateqallattaavunga qanoq appisimaassanersugut, qanoq takutitsissanersugut danskisut taallugu scenekunst qanoq inississorsinnaaneripput atisat qanoq ittuussanersut. Kammalaatiga aperinikuuara atisannik mersuisinnanersoq neriuppunga iluatsissiinnaassasoq taanna, Naja Parnuuna Vahl Olsen oqarpoq.
Unamminissallu qalliartornerani pissanganeriartornini malugisinnaavaa.
- Pissangarsuaarpunga allaanngilaq pissanganera sakkortusiartortoq, taanna oqarpoq.
Pan-Arctic Vision Norgep avannaani siorna siullerpaamik aaqqissuunneqarpoq. Nuijalu nunarput sinnerlugu peqataagami immikkoortumik ”Most Arctic song”-imi ajugaavoq.
Nunarput ukioq manna aaqqissuisuussasoq siorna aamma aalajangerneqarpoq. Aaqqissuussaq KNR-TV-kkut Katuamit oktobarip aqqaneq-aappaanni toqqaannartumik aallakaatinneqassaaq.
