NUIJA ajugaareernerminni: Angusarput nuannaarutigingaarparput
Nipilersortartut assigiinngitsut qulit arfininngormat Pan-Arctic Visionimi peqataapput. Unammisitsineq Europamiut Melodi Grand Prixiannut assingungajappoq.
Nunarpullu ingerlalluarsimavoq: Nipilersoqatigiit erinarsuutaat Issittormiorpalaarnerpaatut nersorneqarluni kiisalu nunarput aappaagu qaaqqusisuusussatut ajugaavoq.
- Nuanneqaaq attortinnaqalunilu assut, Nick Ørbæk KNR-imut taama oqarpoq.
- Angusarput nuannaarutigingaarparput, inuillu nipilersornerput nuannarimmassuk nuannaarutigalutigu. Uatsinnut ajugaanissaq pingaarnerpaanngilaq, kisianni nuannisarutta taanna pingaarnerpaajuvoq.
Lona Platoú nipilersoqatigiinni bassertartuuvoq, taassumallu erinarsuutertik Issittormiorpalaarnerpaasutut nersornaasigaanera aamma tupaallaatigaa:
- Ilimagivallaanngikkaluarakku uanga, taa’ kisiat tupaallappunga nuannaarlungalu, taanna oqarpoq.
- Unnup ingerlanerani takusinnaalerparput ajugaaniarpasittugut. Immitsinnut qiviaannartalerluta 12 pointeraangatta, wow ilaa, nuan', nuannerpoq.
Allaffigitittaartut
Unammisitsineq Norgep illoqarfiani Vadsømi ingerlanneqarpoq. Aaqqissuussisut naapertorlugit "Nunat Avannarliit nipilersornerup tungaatigut ataatsimoortinneqarnissaat" siunertarineqarpoq.
Aaqqissuussap nittartagaani Issittumi nunat assigiinngitsut aappalaartortik atorlugu nunat tamalaat aaqqissuussanni soorlu OL-imi Eurovisionimiluunniit peqataasinnaasannginnertik pillugu misigisartagaat assingusartut aaqqissuussisut nassuiarpaat.
Pan-ArcticVisionimit video.
Amigaatigineqartumullu Pan-ArcticVision aaqqiissutaavoq; siunertarineqartoq tamanut oqaatigineqarsimasoq tassaavoq inuit - nunap inoqqaavi inoqqaajunngitsullu - Issittumeersut erinarsoqatigiitsinniarlugit ataatsimoortinnissaat.
Tamannalu Nick Ørbækip maluginiarsimavaa.
- Inuppassuit ajunngitsut naapillugit nuannersimaqaaq, tassanilu paasivarput nunat avannarlerneersut allat qanoq assigiissuteqarfiginerlutigit.
- Ullut kingulliit messenger facebook suna tamaat qaarnikuungami aamma, allaat aamma maani Danmarkimi allaaserinnittut amerlallutik, DR-ikkut uatsinnut aamma saaffiginnipput B.T., TV2, annertoorujussuamik taamaattumik aamma uppernaajusappoq, taakkuninnga aamma allaffingiteriasaarluni, kisianni nuanneqaaq.
Nipilersortartut ilaatigut Alaskameersut, Ruslandip Issittortaaneersut, Finlandip avannaaneersut Canadamilu Yukonimeersup unammisitsinermi peqataapput.
Nuummi Katuami inuppassuit arfininngormat katerisimaarput, tassani Norgemi unammisitsineq skærmi isiginnaaruterujukkut toqqaannartumik malinnaavigaat.
Aappaagulu inuit Katuami amerlaneruniarpasipput, Kalaallit Nunaammi qaaqqusisuusussaassaaq. Ukiup tulliani Pan-ArcticVisionip ingerlanneqaqqinnissaa apeqqutaaginnarpoq.
- Siullermik NUIJA-kkormiut pilluaqquagut ajugaammata qutsavigaagullu nunarput sinnerlugu aaqqissuussami tassani peqataasinnaammata kusanaqisumillu angusaqarmata. Massakkoqqissaaq Nordting utaqqeqqaalaarparput, taakkumi aaqqissuisuullutillu isumassarsiamut piginnittuummata, taakku aalajangernerat aallaavigalugu siunissami qaninnermi paasinarsissaaq aaqqissuussaq ingerlaqqissanersoq, taamaattoqassappallu, aap Katuami aaqqissuussat taamaattut ingerlanneqarluarsinnaapput, Arnakkuluk Jo Kleist Sermtisiaq.AG-mut oqarpoq.
