Naja P. nunarput sinnerlugu Pan-Arctic Visionimi peqataassaaq

Pan-Arctic Vision Nuummi oktobarimi aaqqissuunneqarpat Naja P. nunarput sinnerlugu peqataassaaq.

Kulturikkut illorsuaq Katuaq aaqqissuussiffiusussaq tusagassiuutinut nalunaaruteqarpoq.

- Nuannaarutigalugu nalunaarutigisinnaavarput Naja P Kalaallit Nunarput sinnerlugu Pan-Arctic Visionimi erinarsussammat. Kalaaleq erinarsortartoq pikkorissorsuaq erinniortorlu Naja P inuusutsigaluni immikkut nipilersornerup silarsuaani maluginiarneqarluarneqareerpoq, kulturikkut illorsuaq nalunaarummi allappoq.

Naja P.-p EP-liaa kingulleq "Naasunnguusunga" KODA Awardsimi KNR Awardsimilu siorna saqqummersitani nersornaaserneqarpoq.

Unammisitsineq Eurovisionimut assingusoq

Pan-Arctic Visionilu suunersoq eqqaamalluanngikkukku taanna tassaavoq issittumi nipilersornermik unammisitsineq Eurovisionimut assingusoq. Norgemi Vadsømi siorna aaqqissuunneqaqqaarpoq, kalaallillu nipilersortartut NUIJA issittormiorpalaarnerpaatut ajugaavoq.

Nunarpullu ukioq manna aaqqissuussisuusussatut aamma ajugaavoq. Taamaammat Pan-Arctic Visionip aappassaanik aaqqissuunneqarnera illoqarfiit pingaarnersaanni kulturikkut illorsuarmi Katuami oktobarip qiteqqunnerani aaqqissuunneqassaaq.

Ukioq manna unamminermi nunanit assigiinngitsunit aqqanilinnit peqataasoqassaaq. Ukunannga Alaska, Yukon, Nunavut, Kalaallit Nunaat, Island, Savalimmiut, Norgep avannaa, Sverigep avannaa, Sápmi, Finlandip avannaa Ruslandillu issittortaa.

Aaqqissuussineq tamarmi toqqaannartumik aallakaatinneqassaaq.

Eqqumiitsuliornermi suliniut inunnut ataatsimoortitsiniarnerusoq

Pan-Arctic Vision eqqumiitsuliornikkut suliniutaallunilu eqqumiitsuliorneq atorlugu Nunanik Avannarlernik ataatsimoortitsiniutaavoq. Unammisitsineq Eurovisionimut attuumassuteqanngilaq. Issittumi inuit – nunap inoqqaavi inoqqaajunngitsullu ataatsimut – erinarsoqatigiinnissaat issittormiullu ataatsimoornissaat siunertaavoq.

- Ajugaasumik toqqaanissaq siunertaavallaarani Issittumi ataatsimoornermik pilersitsinissaq pingaarneruvoq, Amund Sjølie Sveen KNR-imut siorna oqarpoq.

Taanna Norgemi aaqqissuussamik pilersaarusiortumi Nordtingimi eqqumiitsuliornermi siulittaasuuvoq.