Nunarput ajugaagami qaaqqusisuusussanngorpoq, aappaaguli Pan-Arctic Vision ingerlanneqassava?

Pan-Arctic Vision Norgemi arfininngormat siullerpaamik ingerlanneqarpoq. Europami nipilersornermik unammisitsinermut Det Europæiske Melodi Grand Prix-imut assingusumik issittumi unammisitsinertut taaneqarsinnaavoq. 

Tassanilu nunatsinni nipilersoqatigiit NUIKA issittormiorpalaarnerpaamik erinarsuusiorsimasutut ajugaapput ukiullu tulliani qaaqqusisuunissap nunatsinnit isumagineqarnissaa qulakkeerlugu.

Suut tamarmik iluatsissinnaappata.  

- Pan-Arctic Visionip aappassaanik ingerlanneqarnissaa iluatsikkusuttorujussuuarput, massakkulli susoqassanersoq ilisimanngilarput, Amund Sjølie Sveen, Nordtingimi Pan- Arctic Visionimilu Eqqumiitsuliornermut aqutsisoq, KNR-imut oqarpoq.

Suliniaqatigiiffiarannguugamik suleqateqarnissamik pisariaqartitsillutik nassuiaavoq, massakkullu Kalaallit Nunaanni suleqatigineqarsinnaasunut attaveqarnissaq pilersaarutigalugu.

Kalaallit Nunaanni sumiiffiit ilaanni issittumi nipilersortartut nipilersoqatigiillu aappaagu unammillutik appissinnaassappata sorpassuit iluatsittariaqarput.

- Unammiffissarsisariaqarpugut, kisianni aamma aningaasaqarnikkut ikiorneqarnissamik pitsaasunillu suleqatissarsinissaq pisariaqartippagut.

- TV-kkut aallakaatitsinertaa aamma eqqarsaatigisassaavoq, taamaammallu assersuutigalugu KNR-TV teknikkikkut suleqatiginnikkusussinnaassanersoq takussallugu soqutiginassaaq, Amund Sjølie Sveen oqarpoq.

Ataatsimoornermik pilersitsisoq

Siunissamut pilersaarutit nalorninaraluartut Pan-Arctic Visionip Issittumi sumik pilersitseqataasinnaanera pillugu Amund Sjølie Sveen isumalluarpoq.

Taanna isumaqarpoq nipilersortartut isiginnaallu Issittumi killeqarfiit akimorlugit naapinnissaannut periarfissiissasoq.

- Siullermik ingerlanneqarnerani nipilersortartut naapinnerat imminnullu kulturiinillu ilinniarnerat takullu pikkunaqaaq. Ilinniarfiit paasisallu amerlaqaat, attavippassuit pilersinneqarput suliniummilu tamanna siunertaavoq, oqarpoq nangillunilu:

- Ajugaasumik toqqaanissaq siunertaavallaarani Issittumi ataatsimoornermik pilersitsinissaq pingaarneruvoq.

Neriuutigaa Issittumi inuiaat assigiinngitsut qaninnerulersinnissaannut suliniut tamanna aallarniutaassasoq.

Kina iliuuseqassava?

Missingersuutit suli misissoqqissaarneqarsimanngikkaluartut, ukioq manna Pan-Arctic Visionip ingerlanneqarnera 200.000 euro missarissagaat Amund Sjølie Sveen naliliivoq – imaappoq millionit aappaa qiteqqutingajallugu.

Nunatsinnilu aappaagu ingerlanneqarnissaanik takorluugaq piviusunngussappat akeqatigipajaassagaa naatsorsuutigaa.

Amund Sjølie Sveen oqaluttuarpoq Katuaq attaveqarfigereeritsik ukioq manna kalaallinik peqataasussarsiornermut ikiuussimammata. Aappaagulu sumiiffissatsialaassasoq oqarpoq.

- Katuaq pitsassuusoq nalunngilara, taamaammallu suleqatissatut periarfissaalluni. Nuuk nordisk aamma suleqatissatut periarfissaavoq.

- Pisussap iluatsinnissaanut kikkulluunniit suleqatigisinnaanerigut ammaffigerusupparput, Kalaallit Nunaannimi taamaattumik ingerlatsisoqarnissaa torrattorujussuussaaq, Amund Sjølie Sveen oqarpoq.

Katuaq Sermitsiaq.AG-mut oqarpoq aaqqissuussamik taamaattumik inissaqartitsisinnaalluni. 

Taamaattorli Amund Sjølie Sveen isumaqarpoq aappaagu ingerlanneqarnissaanut Nordting ingerlatsisuusariaqanngitsoq.

- Allat unammisitsinermik tigusisinnaanerat, ikualanermik tigusillutik siunissamut kivitsisuusinnaanissaat aamma ammaffigaarput.

Pan-Arctic Vision 2024-mik kikkut isumaginnittuunissaat ilumullu piviusunngussanersoq taamaammat suli nalorninarpoq.