Libanonimi islamisiortut Hizbollahmeersut sumiissusersiutaat qaarmata inuit 2750-it aqqunartitertut
Libanonimi islamisiortut Hizbollahmeersut atortui sumiissusersiutit, attaveqaqatigiinnermut atortagaat, qaarmata inuit 2750-it aqqunartiterput. Inuit qulingiluanit ikinnerunngitsut aamma toqupput.
Libanonimi peqqissutsimut ministereqarfik taama ilisimatitsisoq, nutaarsiassaqartitsivik Reuters allappoq.
Inuit ajoqusertut akornanni amerlanerit kiinnamikkut, assakkut naamikkullu ajoqusersimasut, Libanonip peqqissutsimut ministeria Firass Abiad oqarpoq.
Hizbollahmeersut sumiissusersiutaasa qaararsimanerat, Hizbollahp nammineq uppernarsarpaa.
Sumiissusersiutit qanoq ilillutik qaarsimanersut ilisimaneqanngilaq. Sumiissusersiutit qaarnerat Hizbollahp aamma misissuiffigileruttorpaa.
Israel sumiissusersiutinik qaartitsisuusoq, Hizbollahp pasilliutigaa. Israel naleqquttumik pillarneqarumaartoq, Hizbollah oqarpoq. Nutaarsiassaqartitsivik Reuters taama allappoq.
Israelip illersornissaqarfiata pisut oqaaseqarfigisimanngilai.
Hizbollahmeersut qasserpiaat eqqorneqarsimanersut ilisimaqqissaarneqanngilaq, kikkullu allat aamma aqqunartitersimanersut ilisimaneqarani.
Sumiissusersiutit Libanonimi sumiiffinni assigiinngitsuni qaarsimasut, nutaarsiassaqartitsivik AFP allappoq.
Hizbollahmi tusarfiit ilaata nutaarsiassaqartitsivimmut AFP-mut oqarnera naapertorlugu Hizbollahmeersut Syriamiittut ilaasa sumiissusersiutaat aamma qaarsimapput, qassilli qaarsimanersut oqaatigineqanngilaq.
