Hizbolla nunaqarfinnik saassussivoq
Israelip avannaatungaaniittumut nunaqarfimmut Beit Hillelimut igeriuttakkanik qulikkaanik arlalinnik suliniaqatigiiffik Hizbolla saassussivoq.
Taama suliniaqatigiiffik ilisimatitsisoq nutaarsiassaqartitsivik AFP allappoq.
Suliniaqatigiiffik Libanonip kujataani inissisimasoq Iranimiit tapersersorneqarpoq suliniaqatigiiffiup saassussinini palæstinamiunik tapersersuinerminnik takutitsitsinertut taavaat.
Israelip Libanonimi nunaqarfinnut Kfar Kelamut aamma Deir Siriane saassussineranni sakkutuujunngitsunik eqqugaaffiusunut akiniaanerusoq Hizbollah ilisimatitsivoq.
Saassussineq israelimit oqaaseqaateqarfigineqanngilaq. Saassussinermut atatillugu inunnik ajoqusertoqarsimanersoq ersarinngilaq.
Kangiani qiterlermi sorsunnerup siaruaannissaa ernummatigineqarpoq
Israelip Hizbollahllu akornanni pitsaanngitsumik inissisimaneq aatsaat taamak ajortigileqqavoq, tamannalu pivoq Golanip qattunerngini Israelimik tiguagaaqqasuni igeriuttakkanik saassussinermi meeqqat aqqaneq marluk inuunerminnik annaasaqarmata. Israelip Hizbollah saassussinermut akisussaatutut unnerluutigaa.
Pitsaanngitsumik inissisimaneq ingammik ajornerulerpoq Ismael Haniyeh, palæstinamiut suliniaqatigiiffiata Hamasip naalakkersuinikkut siuttorisaa Teheranimi, Irani illoqarfiisa pingaarnersaanni toqutaammat.
Ismael Haniyehmik toqutsineq aqaguani Hizbollahmik siuttoq Fuad Shukr isaralemiut silaannakkut saassussineranni toqutaavoq.
Hamas Hizbollahlu Iranimit tapersersorneqarput.
Gazami sorsunnerup kangiani qiterlermi sorsunnermut tamakkiinerusumut annerulersinnaaneranik inuartarinninnerup kingunerisinnaagaa ernummatigineqarpoq.
Libanon qimanneqassasoq USA-mi Tuluillu nunaanni innuttaminnut kammattuuteqarput. Israelimut angalanissanik pinaveersaartitsinissaq Canadap innuttani kaammattorpai.
/ritzau/
