KNAPK akerliussutsimik takutitsinialerpoq

Arnarlunniarnissaagaluaq sapaatini akunnerni marlunngortuni pinngitsoorpoq. Maannalu KNAPK marlunngornermi apriilip 18-iani akerliussutsimik takutitsinissamik aarlerisaarilerpoq.

Allattoq Karline Platou, Karline Platou

apriilip 16-at 2023 18:43

Arnarlunniarnissaagaluaq sapaatini akunnerni marlunngortuni pinngitsoorpoq.

Arnarlunniarneq apriilip aallaqqaataani aallartittussaagaluarpoq, aalisartulli suli tassa tamakkuninnga tulaassuinngillat, KNAPK-p Royal Greenlandillu akornanni kilumut aki suli isumaqatigiissutiginngimmassuk.

Maannali KNAPK marlunngornermi apriilip 18-iani akerliussutsimik takutitsinissamik aarlerisaarilerpoq:

.- Killiffik imaannaanngitsoq aalisarnikkut pissutsit eqqarsaatigalugit allaqqussinnaanngitsumik allamik aqqutissaaruttutut misigaluta taamatut siunertaqarpugut, Nikkulaat Jeremiassen KNR-mut oqarpoq.

SULIAQ NAATSUMIK

Aalisartut apriilip aallaqqaataani nipisanniarsinnaanngortarput. Ullunilu 60-ini nipisanniarsinnaatitaapput.
Ukioq mannali taamaattoqanngilaq.
Isumaqatigiinngissut siornarnisaq qaqeqqinneqarpoq.
Royal Greenlandip nipisaat suaannut tunisanut kiilumut 22 koruunimik akiliuteqarniarneranut isumaqatigiinnginneq tunngassuteqarpoq - tamanna annikippallaartut aalisartut isumaqarput, taakkulu tamanna pissutigalugu qassutitik nunamiitsiinnarpaat.
Royal Greenlandip kiilumut 22 koruuni siorna aamma neqeroorutigaa. Tamanna pissutigalugu aalisartut Royal Greenlandip saani Namminersorlutik Oqartussallu silataanni akerliussutsimik takutitsipput.
Sapaatilli akunneri pingasut qaangiuttut aalisartut qassutitik atuliinnarpaat nipisannialerlutillu. Akiliutinneqartorlu 22 koruuni qaffanneqanngilaq.

Arnarluit suaasa akii pillugit KNAPK-miit kissaatigineqarpoq kilomut 5 koruuneqartinneqassasoq. Illuatungerisaasali tassa Royal Greenlandip kissaatigaa siorna akigitinneqartutut kilomut 22 koruuneqartinneqassasoq, tamannali aalisartut akueriumanngilaat.

Inatsisartut Naalakkersuisullu akerliussutsimik takutitsinissami marlunngorpallu piumaartussami oqariartorfiginiarneqarput, KNAPK-miimmi isumaqarput taakku aalisartunut tunngatillugu suliassatik iluamik kivissinnaanngikkaat.

Taamaattumillu Kattuffiup siulittaasua isumaqarpoq Naalakkersuisut tunuartariaqalersut:

- Aningaasap pisissutaasinnaanera eqqarsaatigalugu, allat akissarsiatik naleqqussaraat uagulli sulllitatta akissarsiaat ukiorpassuarni nikigatik inissisimapput, nunattalu avataani qanoq inissisimasoqartoq nalunngilarput. Aalisartut aammalu sulisartut matumani akissaataat aallaaviupput taamatut akuersaarsinnaajunnaarnitsinnut, Nikkulaat Jeremiassen taama oqarpoq.

Aamma atuarukKNAPK-p isumaqatigiissitsiniartoqarusuttoq akitigulli piumasaqaatit aalajangiusimaannarai

KNAPK-p kissaatigaat isumaqatigiinniarnermi Naalakkersuisut akuliuttariaqaraluartut, Royal Greenlandimi Namminersorlutik Oqartussanit pigineqartuummat.

Naalakkersuisulli akulerukkusunngillat, Piniarnermut Aalisarnermullu Naalakkersuisoq Karl Tobiassen naapertorlugu taakku isumaqaramik Naalakkersuisut kattuffiit illersornissaat pingaartikkaat aammalu illuatungeriit namminneq aaqqiisinnaanissaat pingaartikkitsik, taakku tusagassiutinut allagaqarluitk taama oqarput.

Nutaarsiassami kukkunermik nassaarsimaguit uunga allaffigineqarsinnaavugut.