Aalisartut saarulliit akii pillugit akerliussutsimik takutitsisut: Allanik periarfissaqanngilagut

Sisamararterutingajaa.

Saarulliit tunineqarneranut akiat oktobarip qulingiluaannili taama appartigivoq. Naammaleqaarlu, aalisartut isumaqarput. Taamaammat Nuup qeqqani katersortarfimmit ingerlaaqatigiillutik Inatsisartut allaffiata aappaluttup tungaanut ingerlaaqatigiillutik ”Naammaleqaaq”-mik suaartaqattaarput.

Taakkumi qinikkanut suaartaateqarusupput. Aalisartummi qinikkat maanna iliuuseqanngippata akiliisinnaajunnaarnissartik ernumassutigaat.

Saarulliimmi kiilumut akii 10,75 koruunimit 8,25 koruunimut apparput, taamaammat aalisartut kattuffiata, KNAPK-p ullumikkut akerliussutsimik takutitsisoqarnissaa aaqqissuuppaa.

Vittus Poulsen aalisakkat aalisagaatiinnarlugit angerlarsimaffimmit Atammimmit illoqarfiit pingaarnersaannut akerliussutsimik takutitsiartoqataavoq.

- Aalisartoqatikkalu kattuffipput tapersersorniarlugu akerliussutsimik takutitsivugut, taanna KNR-imut oqarpoq.

- Aap, akerliussutsimik takutitseqataanissaq pisariaqarpoq. Ukioq naallugu saarullinniartarpugut, saarulliit annermik tunineqartarput. Illoqarfinnut nunaqarfinnullu allanut sanilliullugu saarulliit akii appasinnerupput, taanna oqarpoq.

Karl Ingemann Maniitsumeersoq Assi © : Jaaku Lyberth/KNR

Karl Ingemannip Maniitsumeersup isumaqatigaa. Taassuma Maniitsumi saarulliit kiilumut 5,75 koruuneqartut oqaatigaa.

- Allanik periarfissaqanngilagut, taamaallaat akerliussutsimik takutitsineq. Naalakkersuisut saaffiginnissutitsinnut qisuariarneq ajorput.

Prisen falder globalt

Royal Greenland illuinnaasiorluni tunisinermi akinik appasippallaartunik aalajangersaalluni pissaaneqarnerusumik inissisimanermik atornerluisoq, KNAPK isumaqarpoq. Akigitinneqartorlu appasippallaartoq kattuffik isumaqarpoq.

Akinik appaaneq aalisakkerivissuup nunarsuarmi niuffaffinni akinik malinninneranik pissuteqartoq, saarulliillu pingaartumik Ruslandimeersut Europami niuffaffinni 30 procentimik akikinnerulersimasut, Royal Greenlandip oqaatigaa.

Saarullinnut akigitinneqartoq 2021-p naanerani nunarsuarmi aatsaat taama qaffasitsigilerpoq, tamatuma kingornali appariartuaaqqilluni.

Nunatsinni qinikkat Inatsisartut allaffiata saani akerliussutsimik takutitsisut 200-t missaanniittut naapippaat. Assi © : Carsten Faurschou/ KNR