Meeqqat illersuisuat meeqqanut naalakkersuisoqarfik pillugu: Neriuuteqarfigilluinnarpara

- Meeqqat illersuisuatut tuppallertorujussuuvunga misigalungalunga meeqqat nipaat aatsaat taama ersaritsigisumik iliuuseqarfiginiarneqalernera. Taamaammat annertuumik neriuuteqarpunga, iliuuseqalertoqarnissaanut meeqqat inuusuttullu ilaqutariit eqqarsaatigalugit.

MIO-mit meeqqat illersuisuat, Aviâja Egede Lynge oqarpoq.

Taassuma Naalakkersuisut nutaat tallimanngormat saqqummiunneqartut qisuariarfigai.

Inuit Ataqatigiimmi Nalerarlu naalakkersuisoqatigiinnissamik nutaamik isumaqatigiissuteqarput. Partiillu taakku marluullutik immikkut naalakkersuisoqarfimmik aamma meeqqanut, inuusuttunut ilaqutariinnullu naalakkersuisumik pilersisoqarnissaa isumaqatigiissutigaat.

AAMMA ATUARUK Múte B. Egede Naalakkersuisut nutaat pillugit: Nuannaarlunga neriuuteqarpunga

Inuit Ataqatigiinniillu Eqaluk Høegh tassani naalakkersuisuussaaq.

Naalakkersuisoqatigiinnissamik isumaqatigiissut naapertorlugu susassaqarfimmi tassani annertuumik suliniuteqarnissaa pisariaqartinneqarpoq.

Meeqqat illersuisuat naalakkersuisoqatigiinnissamut isumaqatigiissummi meeqqanut, inuusuttunut ilaqutariinnullu tunngatillugu aamma eqqaaneqarpoq.

MIO: Tamanna amigaatigisimallugu suaarutiginikuuarput

Meeqqat pisinnaatitaaffiinik qulakkeeriniarnermut tunngatillugu meeqqat illersuisuat suleqatigineqassasoq tassani allassimavoq.

Tamanna meeqqat illersuiata, Aviâja Egede Lyngep qilanaaraa.

- Neriuuteqarfigilluinnarpara maannakkut meeqqat inuusuttut ilaqutariillu iluanni suleriaatsit ataqatigiissaarnerujussuarmik ingerlanneqalissasut, meeqqat illersuisuat oqarpoq.

AAMMA ATUARUK Ataatsimut isigalugu: Naalakkersuisunut ilaasortat nutaat aaku

- Kiisami MIO-miit ukiorpaalussuit nilliaatiginikuusarput nuna tamakkerlugu naalagaaffiit peqatigiinneq pillugu isumaqatigiissutaani malinngisagut malinnialernissaanut pilersaarut suliaq massakkut kiisami aallartissasoq.

Taassuma Naalakkersuisut nutaat siusinnerusumi naalakkersuisoqatigiiusimasunit tusaaniarnerunissaat neriuutigaa.

- MIO-mi meeqqat illiorsuisuat inatsiseq malitarput malillugu politikerinut siunnersuisuutitaareerpugut. Kisianni taamatut atorneqarnikuunerput killeqalaarnikuummat, taamaammat neriuuteqarluarpunga nuannaartorujussuullungalu kiisami taanna iluamik atorniarneqartutut nalunaarutigineqarmat, Aviâja Egede Lynge oqarpoq.