Kuultisiorfimmut Nalunamut isumaqatigiissut nutaaq inuiaqatigiinni akisussaaffimmut tunngasoq

Nalunap, Naalakkersuisut aamma Kommune Kujalliup akornanni nutaamik isumaqatigiissuteqartoqarpoq. Isumaqatigiissut sumiiffimmi suliffissanik innuttaasunullu aningaasanik qulakkeerinnissutaassaaq.

Allattoq Markus Valentin

januaarip 09-at 2026 11:02

Nutserisoq Connie Fontain

Naalakkersuisut aamma Kommune Kujalliup kuultisiorfik Nalunaq piujuartitsinissamut isumaqatigiissuteqarfigaat.

Naalakkersuisut tusagassiuutinut nalunaarummi allapput.

- Kalaallit Nunaata kujataani kuultisiorfissap najukkami inuiaqatigiinni aamma Kalaallit Nunaat tamaat isigalugu ineriartortitsinermut toqqaannartumik iluaqusiinissaa, isumaqatigiissummi qulakkeerneqartussaavoq, tusagassiuutinut nalunaarummi allaasimavoq.

Aamma atuarukKujataani kuultisiorfiusimasoq piiaaffiuleqqeriaannanngungajalertoq

Ingerlatseqatigiiffiup Inuiaqatigiinni Piujuaannartitsisumik sunniutaasussanik naliliineq 2024-mi juunimi suliaraa. Naliliineq taanna oqartussanut isumaqatigiissuteqarnermi tunngaviuvoq.

- Kommune Kujallermut aamma Kalaallit Nunaannut aningaasaqarnikkut inuiaqatigiinnilu tapersiinissaq, isumaqatigiissummi Nalunaq A/S-imut piumasaqaatigineqarpoq, naalakkersuisut allapput.

Inuussutissarsiornermut, Aatsitassanut, Nukissiuutinut, Inatsisit Atuutsinneqarnerannut Naligiissitaanermullu Naalakkersuisoq, Naaja H. Nathanielsen qujamasulluni tusagassiuutinut nalunaarummi oqarpoq:

- Isumaqatigiissummi tassani aalajangersimanerusunik angusaqarnissap aamma oqartussat, inuussutissarsiortut najukkanilu innuttaasut akornanni suleqatigiinnerup nukittunerunissaata tungaannut pingaarutilimmik alloriarpugut, Naaja Nathanielsen allappoq.

Kommune Kujallermi borgmesteri, Malene Vahl Rasmussen (D) assingusumik oqariartuuteqarpoq:

- Isumaqatigiissut isumaqatigiissummi peqataasut tamarmik imminnut takusinnaaffiat atsioqatigiissutigigatsigu nuannaarutigaara tulluusimaarutigalugulu. Kalaallit Nunaata kujataani aatsitassarsiorfimmi suliffissuaqarnerup ineriartortinneqarnera tapersersorparput aamma qanimut suleqatigeereernerput qilanaaralugu. Nalunami kuultisiorfik nunap immikkoortuani pingaaruteqartorujussuuvoq aamma siumut ingerlalluarnissaannik iluatsitsilluarnissaannillu kissaappakka.

NALUNAMI KUULTISIORFIUSIMASOQ NAATSUMIK

Nalunaq A/S Kujataani Nalunami kuultisiornissamik januaarimili piareersarpoq. Naalakkersuisut taamaaliornissaanut akuersigallarlutik.
Kuultisiorfissap avatangiisinut inunnullu piiaavissap eqqaaniittunut qanoq sunniuteqartigiumaarneranik aatsitassarsioqatigiiffiup taassuma naliliilluni nalunaarusiai marluusut naalakkersuisunit akuerineqaqqammerput. Nalunaarusiat akuerineqaqqammertut tassaapput avatangiisinut sunniutaasinnaasunik naliliineq (ASN) aamma inuiaqatigiinni piujuaannartitsisumik ingerlatsinermik naliliineq (IPN).
Tassa aatsitassarsioqatigiiffik taanna piiaanissamik akuerineqariaannanngungajalerpoq.
Amaroq Minerals Ltd Nalunaq A/S-imik piginnittuuvoq.
Kujataani innuttaasunik Nalunami kuultisiulersaarneq pillugu januaarip 29-anni februaarillu aallaqqaataani ataatsimiisitsisoqarpoq. Aatsitassanut naalakkersuisoq Naaja H. Nathanielsen (IA) aamma avatangiisinut naalakkersuisoq Kalistat Lund (IA), Kommune Kujalliup borgmesteria Stine Egede Nalunaq A/S-imeersullu ataatsimiisitsinerni najuupput.
Nalunami kuultisiorfiusimasoq Nanortallip eqqaani Napasorsuup Qooruaniippoq.
Kuultisiorfiusimasoq 2004-imi pilersinneqartoq imminut akilersinnaajunnaarmat 2013-imi matuvoq. Tamanna kuultimut akimik nunarsuarmi niuffaffinni appaanermik ilaatigut pissuteqarpoq.
Kunngi Frederiup dronning Maryllu pissiartaariillutik assammiortaavi kuultimik Nalunameersumik sanaajupput.

Allisiguk

Isumaqatigiissut ima ilaqartoq

Nalunap isumaqatigiissuteqarnermini 2026-mi sulisut 40 procentii kalaaliussasut atsiorpaa. Kisitsit taanna ukiuni tulliuttuni marlunni sulisut affaannut amerlineqassaaq.

Ingerlatseqatigiiffiup nunaqavissumik sulilersitsinissamut piumasaqaat naammassisinnaanngikkuniuk anguniagassap ataannerinut procentinut tamanut 100.000 koruuninik akiligassinneqartassaaq.

Nunaqavissumik sulilersitsinissap saniatigut ingerlatseqatigiiffiup ingerlatsinermut missingersuutaasa 10 procentii najukkami suliffeqarfinnut atussavai kiisalu kuulti kiilup affaa kalaallinut innuttaasunut qaammatit pingasukkaarlugit tunisassiarineqartassaaq.

Kiisalu Nalunap kultureqarnermut, avatangiisinut inuiaqatigiinnullu suliniutinut ikinnerpaamik 100.000 koruunit ukiumut atortassallugit.

Nalunami pisortap, Eldur Olafssonip isumaqatigiissut pingaaruteqarnerarpaa.

- Najukkami soqutiginnittut Kalaallit Nunaanni neriulluarnartumik ineriartortitsinissamut tapersersormatigut qujamasuutigaarput. Kalaallit Nunaata pisuussutigisinnaasaasa kaanngartinnissaannut suli aalajangersimasumik suleqataaginnassaagut aamma oqartussanik maleruagassiisartunik pilersitsiviulluartumik suleqateqarnerput ingerlatiinnassallugu, pisortaq tusagassiuutinut nalunaarummi allappoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.