Kujataani kuultisiorfiusimasoq piiaaffiuleqqeriaannanngungajalertoq

Kujataani Nalunami kuultisiortoqaqqilersaarpoq. Kuultisiorfik taanna inuussutissarsiornermik inerisaanissamut pingaaruteqarsinnaasoq, naalakkersuisoq Naaja H. Nathanielsen oqarpoq.

Allattoq Ann-Sophie Greve Møller

juulip 19-at 2024 07:55

Nutserisoq Hanne Petersen

Kujataani Nalunami kuultisiortoqaqqilersaarpoq.

Tassa aatsitassarsioqatigiiffik Nalunaq A/S kuultisiorfiusimasumi tassani piiaaqqilersaartuusoq januaarimi piareersaleramili qaartiterutaasivimmik pilersitsivoq.

Nalunamilu kuultisiortoqaqqilissasoq, aatsitassanut naalakkersuisup Inuit Ataqatigiinneersup Naaja H. Nathanielsenip neriuutigaa.

- Suliniut taanna iluatsissangatipparput. Kuultisiorfiusareeramimi piiaaffiuleqqeriaannaallunilu ilisimasaqarfioreermat iluatsilertorsinnaasunut ilaassangatipparput, Naaja H. Nathanielsen oqarpoq.

Aningaasarsiornermut pingaaruteqassaqisoq

Nalunami kuultisiorfiusimasoq 2004-imi pilersinneqartoq imminut akilersinnaajunnaarmat 2013-imi matuvoq. Tamanna kuultimut akimik nunarsuarmi niuffaffinni appaanermik ilaatigut pissuteqarpoq.

Tamannali Nalunamut aningaasaleerusussinnaasunik qimarratsitsinngilaq.

Tamannalu nuannaarutissaasoq, Naaja H. Nathanielsen isumaqarpoq. Nalunamimi kuultisiorfiusimasoq nunatsinni inuussutissarsiornermik inerisaanissamut Kujataanilu aningaasarsiornermut pingaaruteqassaqisoq, taanna oqarpoq.

- Nunatsinni atortussiassanik piaanernit suli iluanaaruteqangaartalernikuunngilagut, piiaanerilli nunatsinni inuiaqatigiit aningaarsarsiornerannut pingaaruteqalereernikuupput, taanna oqarpoq.

NALUNAMI KUULTISIORFIUSIMASOQ NAATSUMIK

Nalunaq A/S Kujataani Nalunami kuultisiornissamik januaarimili piareersarpoq. Naalakkersuisut taamaaliornissaanut akuersigallarnikuupput.
Kuultisiorfissap avatangiisinut inunnullu piiaavissap eqqaaniittunut qanoq sunniuteqartigiumaarneranik aatsitassarsioqatigiiffiup taassuma naliliilluni nalunaarusiai marluusut naalakkersuisunit akuerineqaqqammerput. Nalunaarusiat akuerineqaqqammertut tassaapput avatangiisinut sunniutaasinnaasunik naliliineq (ASN) aamma inuiaqatigiinni piujuaannartitsisumik ingerlatsinermik naliliineq (IPN).
Tassa aatsitassarsioqatigiiffik taanna piiaanissamik akuerineqariaannanngungajalerpoq.
Amaroq Minerals Ltd Nalunaq A/S-imik piginnittuuvoq.
Kujataani innuttaasunik Nalunami kuultisiulersaarneq pillugu januaarip 29-ani februaarillu aallaqqaataani ataatsimiisitsisoqarpoq. Aatsitassanut naalakkersuisoq Naaja H. Nathanielsen (IA) aamma avatangiisinut naalakkersuisoq Kalistat Lund (IA), Kommune Kujallerup bormesteria Stine Egede Nalunaq A/S-imeersullu ataatsimiisitsinerni najuupput.
Nalunami kuultisiorfiusimasoq Nanortallip eqqaani Napasorsuup Qooruaniippoq.
Kuultisiorfiusimasoq 2004-imi pilersinneqartoq imminut akilersinnaajunnaarmat 2013-imi matuvoq. Tamanna kuultimut akimik nunarsuarmi niuffaffinni appaanermik ilaatigut pissuteqarpoq.
Kunngi Frederiup dronning Maryllu pissiartaariillutik assammiortaavi kuultimik Nalunameersumik sanaajupput.

Allisiguk

Atortussiassanimmi piiaaffiit suliffissaqartitsisarlutillu assartugalerisussarsiortoqarlunilu nerisassanik pilersuisussarsiortoqartarpoq. Tamakkualu aningaasarsiornerunissamut malunnaateqartarput.

- Atortussiassanik piiaalersaarnerit ikittuinnaat iluatsittarput, imaanngilarli iluatsittut kisiisa inuiaqatigiinnit iluanaarutaasartut. Suliniutimmi tamarmik iluanaaruteqarfiusarput. Taamaammat atortussiassanik nunatsinni piiaanissaq soqutigineqartuarsinnarnissaa nunatsinnut pingaaruteqarpoq, Naaja H. Nathanielsen oqarpoq.

Kuultisiornissamik pilersaarutaa suli akuerineqanngitsoq

Nalunaq A/S-ili kuultisiornissamut kuultisiorfissamilu matunissaanut pilersaarutini naalakkersuisuisunit akuerineqarsimatinnagit kuultisiulersinnaanngilaq.

Aamma atuarukNunatta kujataa sikorsuit pissutigalugu aningaasanik annaasaqartoq – naalakkersuisut naammagittaqqusisut

Atortussiassanik nunatsinni ataasiinnarmik massakkorpiaq piiaaffeqarpoq, tassaasoq White Mountain Kangerlussuup eqqaaniittoq. Tassa taanna anorthositimik piiaaffiuvoq. Anorthosit ujaraavoq qaqortoq, taannalu laatigut glasfiberiliornermi cementiliornermilu akorineqartarpoq.

Qeqertarsuatsiaat eqqaanni Aappaluttumi rubinisiorfik 2023-mi januaarimi matugallarpoq. Matugallarnera piginneqatigiiffiup aligornik piiaasimasup Greenland Rubyp Aappaluttumi qanoq rubineqartigineranik misissuisitsiniarneranik pissuteqartumik matugallarneqartoq, Sermitsiaq.AG allappoq.

Nutaarsiassami kukkunermik nassaarsimaguit uunga allaffigineqarsinnaavugut.