Partiit siulittaasui ataatsimut nalunaaruteqartut: Inuiattut ataatsimoorpugut

Partiit tallimat siulittaasui tallimanngornermi unnukkut ataatsimut nalunaaruteqarput, oqariartuutaallu ersarippoq:

- Amerikamiuunianngilagut, qallunaajunianngilagut, Kalaaliuniarpugut.

- Kalaallit Nunaani partiini siulittaasuusugut aammaartumik Nunatta USA-miit tatineqannginnissaa naqissuserusupparput, taakku allapput.

Partiit tallimat siulittaasuisa nunarput tamat oqartussaaqataanerannik aallaaveqartumik inuiannik qinikkat USA nunallu killiit allat suleqatigisaat oqaaseqaatiminni erseqqissaatigaat. Suleqatigiinneq tamanna siunissami ingerlaannassaaq.

Kalaallit Nunaata siunissaa kalaallinit inuiaanit aalajangerneqassaaq, Kalaallit Nunaata Siunissaa kalaallit inuit oqaloqatiginerisigut suliarineqarpoq, aamma nunat tamalaanit inatsisit aamma Namminersorneq pillugu inatsit aallaavigalugit pitsanngorsarneqarluni, partiit tallimat siulittaasui allapput.

- Nunat kikkuugaluartulluunniit tamanna akuliuffissarinngilaat, taakku allapput.

Ataatsimiinnissat siuartinneqassasut

Partiit tallimat siulittaasuisa pisortatigoortumik nunallu tamalaat akunnerminni periusiat atorlugit oqaloqatigiinnerit ingerlanneqarnissaat kaammattuutigaat.

- Iligiittut ikinngutigiittullu tamanna aqqutissaavoq, taakku allapput.

Taamaammat siulittaasut Nunatta iligisaannik nunanillu suleqatigisatsinnik qanimut atassuteqarnerit qulakkeerneqassasut aamma Inatsisartuni ataatsimiinnissat ataatsimoortumik oqallittoqarnissaa qulakkeerniarlugu siuartinneqarnissaat isumaqatigiissutigaat.

Partiit siulittaasuisa pissutsit imaannaanngitsuunerarpaat nunatsinnilu inuit toqqissimanissaannik anguniartuagaqarnertik ingerlatissallugu naggasiutigaat.

- Ataatsimoorpugut Nunatta qaqugumut Inuiaat Kalaallinit nunagineqartuarlunilu nammineq aalajangiiffigineqartuarnissaanut. Kalaallit Nunaat Kalaallit Pigaat.

Nalunaarut Demokraatinit Jens Frederik Nielsenimit, Naleqqamit Pele Brobergimit, Inuit Ataqatigiinnit Múte B. Egedemit, Siumumit Aleqa Hammondimit, Atassummit Aqqalu C. Jeremiassenimit atsiorneqarpoq.