- Patajaatsumik ukiuni sisamani aggersuni naalakkersuinikkut aalaqqajunngitsumik tatigeqatigiiffiusumik suleqatigiinnissatsinnut immitsinnut naqissusiilluta ullumikkut naalakkersuisoqatigiinnissamik isumaqatigiissusiorsinnaagatta pingaartippara, Múte B. Egede oqarpoq.Assi: Scanpix

Múte B. Egede Naalakkersuisut nutaat pillugit: Nuannaarlunga neriuuteqarpunga

Naalakkersuisoqatigiilersut Atassullu ikorfartortaasutut aaqqissuummi pitsaanerpaasut, Inuit Ataqatigiinni Naalakkersuisunilu siulittaasoq oqarpoq.

- Nuannaarpunga aamma neriulluarpunga siunissamut aggersumut. Naalakkersuisoqatigiit pilersitatta, Inuit Ataqatigiit aamma Naleraq, kiisalu Atassut tapersortigalugu, nunatta ukiuni aggersuni sisamani siulersornissaanut.

34-nik ukiulik, Múte B. Egede Inuit Ataqatigiinnut siulittaasuuvoq, taannalu Naleqqamut naalakkersuisoqatigiinnissamik isumaqatigiissumminik saqqummiussereernermi kingunerisaanik Naalakkersuisuni siulittaasuusimasuni nukarlerpaanngungalerluni.

Inuit Ataqatigiit Nalerarlu naalakkersuisoqatigiinni assigiinngitsunik suliniutissaqarput. Múte B. Egedellu pingaarnerpaasorisani erseqqissaatigai:

- Pingaartinnerpaarpaavara inuiaqatigiinni inuit ulluinnarni atugaasa, unammillernartunik aamma massakkut nalaattaqarfiusut, nalingiinnginnerlu annertusiartuinnartoq, taakkua akiorniarlugit inuit atugaannik pitsanngorsaanissamik nunatsinni pisuussuigut pingaarnerpaat inuk qitiutillugu sulinissarput tunngavissinniaratsigut.

AAMMA ATUARUK Ataatsimut isigalugu: Naalakkersuisunut ilaasortat nutaat aaku

Partiit naalakkersuisoqatigiilersut marluk ukiuni sisamani patajaatsuunissaminnik imminnut aamma neriorsueqatigiipput.

- Patajaatsumik ukiuni sisamani aggersuni naalakkersuinikkut aalaqqajunngitsumik tatigeqatigiiffiusumik suleqatigiinnissatsinnut immitsinnut naqissusiilluta ullumikkut naalakkersuisoqatigiinnissamik isumaqatigiissusiorsinnaagatta pingaartippara, Múte B. Egede oqarpoq.

Atassut ikorfartortaasutut: Ukiunut tulliuttunut sisamanut suleqatigiinneq pitsaanerpaasoq

Naak Atassut naalakkersuisoqatigiilernissamut isumaqatigiinniarnerni peqataangaatsiaraluarluni partii Naalakkersuisunut ilaalinngilaq. Atassutilli naalakkersuisoqatigiinnut ikorfartortaaniarluni aalajangerpaa.

- Aallaqqaataaninngaanniit isumaqatigiinninniarnerit aallartimmata malunnarpoq uagut piffissami kingullermi ukiuni marlunni-pingasuni, Naleraq, Atassut Inuit Ataqatigiillu illuatungiliuttuni qanimut suleqatigiissimanerput aamma tatigeqatigiinnermut pilersitsiviusimasoq. Taanna nangeqqissinnaanissaanut periarfissaq annertuujusoq.

- Isumaqatigiinninniarnerummi ingerlanerani soorunami partiit inissisimaffit aallaavigalugit Atassutip toqqarpaa tunuliaqutsiiniarluni, naalakkersuisoqatigiillu partiini marlunnik pilersitsiviussasut.

- Taannalu isumaqarpunga pitsaasuusoq, nunatsinni naalakkersuinikkut aaqqissuussineq aammalu tunngavik pitsaasoq taamatut tunngavissinneqarsinnaammat. Taamalilluta naalakkersuisoqatigiit partiivi 16-inik aamma Atassutip ilaasortaatitaavi marluk tunuliaqqutsiisartut Inatsisartuni ilanngukkaanni 18-inik 31-suninngaanniit ilaasortaatitaqartussaalluta.

Naalakkersuisoqatigiinnissamut isumaqatigiissummi Kuannersuit unitsinneqarnissaat

Inuit Ataqatigiit nunatta kujataani aatsitassarsiornissamik suliniutip unitsinneqarnissaa qineqqusaarutigaa. Suliniut taanna juunip ulluisa aallaqqaataata tungaanut tusarniaassutigineqarpoq.

- Kuannersuarni pilersaarut ersarissorujussuarmik Inuit Ataqatigiit qineqqusaarnermi kisianni aamma massakkut naalakkersuisoqatigiiliornermi unitsinneqarnissaanik oqariartorpugut. Inuiattut avissaarfigut qitiuallaarujuussualeqaat, ataatsimoorfigut aallaaviginerusariaqalerpagut. Tassaniipput inuiaat ataatsimoortut nukissaqarluarlutik nunarsuarmioqataallutik aammalu ulluinnarni atukkaminni kivitsisussat tunngavissaat.

AAMMA ATUARUK Isumaqatigiissummit tigulaarineq: Isummersuisit nutaat, inissaaleqisuerunneq Kuannersuarnilu suliniummik taamatitsineq

- Taamaammat isumaqarpugut Kuannersuarni pilersaarut unitsinneqassasoq. Taanna unitseriarlugu, aallaavigisinnaasagut ataatsimoorfigisinnaasagut tamaasa tunngavigalugit ineriartorneq tunngavissittariaqarparput. Avatangiisigut akiginagit, nunatta ineriartornissaa tunngavissikkumagatsigu.

Qineqqusaangaatsiartoqareersoq qinersinermilu ajugaareernerup kingunerisaanik isumaqatigiinniareerluni Múte B. Egede ilaquttanilu qasuersaassapput.

- Uannut pingaarnerpaavoq tassa naalakkersuisoqatigiit manna saqqummiussakka, isumaqatigiissupput, ataatsimoornerput qanorlu tunngaveqartumut suliniarnerput inuiannut saqqummiutissallugu. Tassa ullormut uanga nalliussisassara. Inuiaat kiffartuullugit kiffartuunniarlugillu ukiuni aggertuni sisamani. Sulinerput aallartilerpoq qilanaarlungalu tassunga.

- Unnuup sinnera ilaquttakka peqatigiumaarpakka qanimut aamma ulloq nuannersumik taamatut ingerlatarput ullumikkut naggaserluassallugu.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat