Meeqqat atuarfii: Misilitsissutissat piareersarneqarput

Meeqqat atuarfianni soraarummeernissat namminersorlutik oqartussanit suli allanngortinneqanngillat.

Pissutsit taamaappoq Nuummi atuarfiit sapaatit akunnerini pingasuugallartuni matugaluartut. Illoqarfinni nunaqarfinnilu allani atuarfiit tallimanngorpat ualikkut matussapput.

AAMMA ATUARUK Meeqqat corona pillugu saaffiginnittut: Aneersinnaavugut?

- Atuartut misilitsinnissaannut atortussat pilersaarutit malillugit ingerlappagut aammalu naatsorsuutigalugu misilitsissutissat pilersaarutaasutut nassiussuukkumaarlugit, ilinniartitaanermut aqutsisoqarfimmi pisortaq Simon Lennert KNR-mut oqarpoq.

Coronamut akiuiniarneq Nunatsinni pingasunngornermi sakkortusivoq coronamik tunillatsissimasut Nuummi marlunngormata. Naalakkersuisut siulittaasuat nalunaarpoq atuarfiit matusut aammalu timmisartunik umiarsuarnillu angallanneq unissasoq. Umitsiat atorlugit inoqarfinniit inoqarfinnut angallanneq aamma inerteqqutaalerpoq.

AAMMA ATUARUK Nuuk matuvoq: Nalunaaqutaq 16:00-imiit ima ilioqqusaanngilatit

Kinguartitsineq

Atuarfiilli matoqqagallarnerat apeqqutaatinnagu meeqqat atuarfianniit misilitsittussat soraarummeersimanermut uppernarsaatit pisariaqartippaat ilinniarnermi ingerlaqqinnissaminnut.

- Pisut covid-19-imut attuumassutillit imaaginnavissut malinnaaffigeqqissaarpagut. Naatsorsuutigaarput covid-19-ip siammatssaliornerata kingunerisaanik arlaatigut kinguaatoortoqarluniluunniit allannguisoqassagaluarpat susassaqartut paaseqatigiissuteqarnermikkut meeqqanut atuartunut inuusuttunullu ilinnialersussanut sunniutigisinnaasai minnerpaaffianiitinniarneqarumaartut.

AAMMA ATUARUK Corona: Kommunet angerlarsimaffimmi imatut atuartitsissapput

- Tassa eqaatsumik naleqqussaasoqarsinnaanera apeqqutigisatit eqqarsaatigalugit inissisimaffigaarput, Simon Lennert oqarpoq.

Illoqarfinni nunaqarfinnilu iPadsit atorlugit angerlarsimaffinni atuartitsisoqarpoq. Sumiiffinni iPadsinik atuiffiunngitsuni atuakkat allattaaviillu atorlugit ilinniagassiisoqartarpoq.