Meeqqat atuarfianni atuartitsinerup ilarujussuaq sapaatip akunnera tullermiit iPadit atorlugit pissalissaaq.Assi: Noah Mølgaard

Corona: Kommunet angerlarsimaffimmi imatut atuartitsissapput

Ini atuarfiusoq qimallugu atuartitsineq ilinniagassanillu tunniussineq iPadimut nuunneqassaaq nualluussuaq corona pillugu atuarfiit matusussanngormata

Kommunet arlallit ullut kingulliit meeqqat atuarfiata matunissaanut piareersarput. Pilersaarusiaallu ingerlaannaq atulissaaq atuarfiit matunissaat Naalakkersuisunit maanna nalunaarutigineqarmat nualluussuaq corona siaruatsaaliorniarlugu.

AAMMA ATUARUK Coronavirusip ernumassutigineqarnera: Atuarfiit timmisartuussinerillu matulersut

Atuarfik Hans Lynge Nuummiittoq ippassigami atuarfiup angajoqqaanut intraani allappoq atuarfiit matoqqaneranni atuartitsinissaq ilinniartitsisunit piareersaasiorneqartoq. Atuarfimmi aqutsisut aamma erseqqissarpat atuartitsisussaanermik pisussaaffik atuarfiup naammassiniassamaaraa.

Atuarfiit matunissaat ataasinngornermiit piviusunngulerpoq, nuna tamakkerlugu atuarfiit sapaatit akunnerini marluugallartuni matussammata. Naalakkersuisut siulittaasuat Kim Kielsen marlunngornermi ualikkut tusagassiortunik katersortitsinermi taama ilisimatitsivoq. Aalajangerneq taanna partiit tamarmiusut taperserpaat.

AAMMA ATUARUK Meeqqat illersuisuat: Angajoqqaat coronavirusi ernummatigaluga saaffiginnittorpassuupput

Qeqqata Kommunia aamma piareersaateqareerpoq.

- Atuarfiit matoqqagallarneranni atuartitsineq internet atorlugu pissaaq. Qeqqata Kommuniani atuartut angerlarsimaffiini internettimut attaveqartitsisoqarpoq aammalu iPadit atorlugit atuartitsinissamut arlalinni periusissaqareerluni, Qeqqata Kommuniani ilinniartitaanermut pisortaq Annga Lynge KNR-mut oqarpoq.

AAMMA ATUARUK Misissukkat nutaat inerneri: Coronavirusimik ataasiinnaq suli kisimi tunillatsinnikuuvoq

Atuakkat atussapput

Taassuma ilanngullugu oqaatigaa ukiup ingerlanerani atuartitsinissamut pilersaarut Qeqqata Kommuniani atuarfiit maliinnassagaat naak atuartitsineq angerlarsimaffimmut nuunneqaraluartoq.

Avannaata Kommunia aamma atuarfiit matoqqagallarnissaannut piareersaateqarpoq.

- Ilulissani atuarfiit Atuarfik Mathias Storch aamma Atuarfik Jørgen Brønlund ukioq missaliorlugu iPadinik atuiffioreerput. Taamaattumik digitaliusumik atuartitsinissaq piareersarneqarpoq. Kisianni Uummannami, Upernavimmi Qaanaamilu atuarfinni iPadit atorneqanngillat. Taamaattumik ungasianiit atuartitsinissaq taakkuna ajornakusoorneruvoq, taamaattoq periarfissaasinnaasunik misissuilereerpugut. Ilanngullugu erseqqissaatigerusuppara angerlarsimaffinni atuartitsinerup angajoqqaanut nanertuutaanissaa siunertarineqanngilluinnarmat, Avannaata Kommuniani borgmesteri Palle Jerimiassen KNR-mut oqarpoq.

Kommuneqarfik Sermersuup ajornartorsiulernermi pilersaarutaa aamma atuutilissaaq.

- Atuarfinni ungasianiit atuartitsineq atuutissaaq taamatut periarfissaqartuni. Atuarfinni sulisut piareersaassapput aammalu nittartakkat atorlugit atuarfiup angerlarsimaffiullu periarfissaqarfigisaat atorlugit atuartitsisoqassalluni. Atuartut internettimut attaveqanngitsut atuakkat naliginnaasut atorlugit atuassapput atortussallu ilinniartitsisorisap isumaqatigiissuteqarfigineratigut atuarfimmut aaneqassapput, Kommuneqarfik Sermersooq nalunaarpoq, ilanngullugu nalunaarutigaa ulluunerani paaqqinnittarfiit ammaannassasut.

Kim Kielsen nalunaarpoq ilinniarfiit pisarneq malillugu ingerlaannassasut.

- Ilinniarfinni atuartut tassaapput inersimasut. Tatigilluinnarpara taakku inersimasuugamik eqqiluisaarnissamik aammalu inuit amerlavallaanngitsukkaarlutik isersimaqatigiittarnissaannik inassuteqaatit malissinnaagaat, Kim Kielsen oqarpoq.

Isummersuutit