Meeqqat illersuisuat: Angajoqqaat coronavirusi ernummatigaluga saaffiginnittorpassuupput
Ernumanermi kamannguuttoq meeqqat illersuisuat oqarpoq.
- Matoqqusipput. Paasisinnaanngilaat Kalaallit Nunaanni meeqqat illersugaassappata sooq matusisoqannginnersoq. Tamanna paasiuminaatsinneqartorujussuuvoq innuttaasuninngaanniit, Aviâja Egede Lynge oqarpoq.
Nunatsinni coronavirusi annguttoq Naalakkersuisut siulittaasuata ataasinngornermi tusagassiortunik katersortitsinermini kalerriutigaa.
- Nunarput unittoortissanngilarput oqarluta meeqqeriviit tamarmik matupput, atuarfeqarfiit tamarmik matupput. Taava peqqinnissaqarfimmi sulisut, pisariaqartitsivinni sulisut allallu tassuuna kalluarneqartussaassapput.
- aaqqissuussat inunnit 100-nit amerlanerusunit peqataaffigineqartussat nangaasaarutigineqarluinnarput.
- nunatsinniit nunatsinnullu sapinngisamik angalasoqassanngilaq. Tamanna nunatsinni angalanermut atuuppoq.
- illoqarfinni bussit ilaasunik ulikkaaveqqusaanngillat.
- timersortarfiit, naluttarfiit sutorniartarfiillu isersimasorisinnaasatik affaannaat isersimatittassavaat.
- inuit nunami aarlerinaatilimmeereerlutik nunatsinnut utertut tikinnerminniit ulluni 14-ini tulliuttuni angerlarsimaannaqquneqarput.
- inuit nunami aarlerinaatilimmeereerlutik nunatsinnut utertut napparsimmavinnut, utoqqaat illuinut illuutinullu allanut aarlerinaateqarfiulersinnaasunut ornigutissanngitsut.
- Uani piareersarneqartussaassagami taakkua meeraat paarigallarneqartussaassasut, Kim Kielsen tusagassiortunik katersortitsinermi oqarpoq.
Tamatumalu kinguneranik meeqqeriviit atuarfiillu iliuuseqarfigineqannginnerat angajoqqaanut kamaqalersitsivoq.
- Paasiuminaatsinneqartorujussuuvoq sooq atuarfiit meeqqeriviillu iliuuseqarfiginiarneqannginnerat,
- Ernumaneq sakkortuseqqippoq. Taavalu ernumaannaratik angajoqqaat massakkut kamassaqarlutik saaffiginnittalertut nalaattalerpagut.
Meeqqat Illersuisuat angajoqqaanit ullut tamaasa meeqqat illersorneqarnissaat anguniarlugu oqartussat sulinerannut akuliuteqqusillutik qinnuiginnittunit saaffigineqartarpoq.
Tunillaassortunik nappaalasoqarneranut ataatsimiititaliarsuup inuit 100-nit amerlanerusut ataatsimooqqunagit kaammattuutigaat. Meeqqalli atuarfiisa ilaanni 500-t sinnerlugit atuartoqarpoq.
Innuttaasut atsiornernik katersisut
Pisut killiffii eqqarsaatigalugit atuarfiit meeqqeriveqarfiillu matuneqassanngitsut nakorsaanerup Henrik L. Hansenip tusagassiortunik katersortitsinermi ataasinngormat oqaatigaa.
- Siullermik meeqqat atuartinneqanngitsuussapput. Aappaattut tuniluuttoqannginnissaa taamatut pinaveersaartissinnaanngilarput. Illuatungerluinnaanik pisoqarataannaavoq, meeqqammi akornanni tunillatsittoqarsimasinnaavoq nalusatsinnit, taakkulu atuaratik sumiiffimmi allami ataatsimoorsinnaapput. Taamaattoqassappallu ajornerusumik kinguneqarsinnaalluni, nakorsaaneq Henrik L. Hansen oqarpoq.
AAMMA ATUARUK Nunatsinni inuk ataaseq coronavirusimik tunillatsissimasoq
Nakorsaanerup taama oqariartuuteqarnera angajoqqaanit aamma tigulluarneqanngilaq. Taamaammat innuttaasut nammineerlutik nittartakkatigut atsiornernik katersipput, meeqqeriviit atuarfiillu sapaatit akunnerini tullerni marlunni matoqqatinnissaat anguniarlugu.
- Ernumassuteqartut annertuut ilagilluinnarpaat inuit 100-t qaangerlugit katersuuteqqusaannginnerat. Angajoqqaarpassuit paasiuminaatsippaat sooq taanna meeqqanut atuutinnginnersoq, Aviâja Egede Lynge oqarpoq.
Nittartakkatigut skrivunder.net-imi atsiortut maanna 900 sinneqarput.
