Nunatsinni inuk ataaseq coronavirusimik tunillatsissimasoq
Inuk ataaseq coronavirusimik tunillatsissimavoq.
Kim Kielsen tusagassiortunik katersortitsinermi taama ilisimatitsivoq.
Taamaalilluni tunillatsissimasutut nunatsinni paasineqartuni siulliulluni.
AAMMA ATUARUK Nunatta nakorsaanera mittarfinni misissuisarnissamut naaggaartoq
- Naatsorsuutigineqarluinnarpoq. Tunillatsissimasoq sumiiffinni aarlerinaateqartumiissimavoq, taannalu angerlamut tikikkamili angerlarsimaffimmini mattuteqqasimavoq. Tunillaasimasinnaaneranut aarlerinartoqanngilaq, nakorsaaneq, Henrik L. Hansen oqarpoq.
Virusimik tunillaassuinaveersaarnissamut innersuussutit aaku:
- Asalluartarneq ajornanngippat asareernermi assaallu panerneranni assanut tunillannartuiaat atorlugu eqqiluisaarluarneq
- Inuit nuattut/toqqusaarluttut qanillinaveersaarneri
- Kakkissarfimmut ataasiartakkamut ikutsilluunniit peqiffianut quersorlutillu tangajortarit
- Kuniuinak, eqitaarinak assammiinallu.
Tunillatsissimasoq Nuummi najugaqarpoq, angerlarsimaffimminilu mattuteqqalluni. Taanna ilaqutaalu angerlarsimaffimminni mattuteqqareerput, maannalu suli mattuteqqallutik.
Tunillatsissimasoq pillugu annerusumik paasissutissaqanngilaq. Tunillatsissimasoq sumi tunillatsissimanersoq ilisimaneqanngilaq.
Tunillaassortunik nappaalasoqarneranut ataatsimiititaliarsuup tunillatsittoqarsimasumik paasisaqarnissamut siullermut piareersartoqarsimanera oqaatigaa.
- Pisut qanimut malinnaavigaagut. Qanoq ingerlasoqarnissaanut isumatusaartumik iliuuseqassaagut. Qaammatini tulliuttuni pingasuni Europami tuniluuttoqassaaq, taamaammat qaammatit pingasut tulliuttut nunatsinni tuniluttoqarnissaanut aarlerinartoqarpoq, nakorsaaneq, Henrik L. Hansen oqarpoq.
Allat ullumi misissoqqissaarneqassasut
Inuit 25-t missaanniittut misissorneqarput, taakkulu akissutisinissaminnut utaqqillutik. Misissugassat Statens Serum Institutimut nassiunneqarput, inernerilu aqagu piariissallutik.
- Qassiiusunit ullumikkut sianerfigineqareerpunga - nutaamik nassaartoqarnerani sianerfigineqartuaannarpunga. Ullumikkut qulit misissornissaat naatsorsuutigaarput, Henrik L. Hansen oqarpoq.
Atuarfiit paaqqinniffiillu matussanngitsut
Nakorsaanerup oqarnera naapertorlugu atuarfiit ulluuneranilu paaqqinniffiit matussanngillat.
- Atuarfiit matuneqarnianngillat. Nukappiaqqat qulit nukappiaqqat inaannut katersuukkunik atuarfiit matunerannit ajornerussaaq, Henrik L. Hansen oqarpoq.
AAMMA ATUARUK Tamaat isigalugu: Coronavirus pillugu killiffik
Inuit arfinillit tunillatsissimanersut misissorneqarsimapput. Siullermik marsip qulingiluaani inuit pingasut Danmarkimit timmisartorsuarmut ilaasimasut coronavirusimik tunillatsissimasutut pasitsaanneqarput. Taakku misissorneqarnerat aqaguani paasineqarpoq, tunillatsissimanngitsullu.
Marsip aqqarnani inuit pingasut allat coronavirusimik tunillatsissimanersut misissorneqarput. Ilaasoq ataaseq marsip qulingiluaani timmisartumut ilaasimasuuvoq. Allat marluk Canadami Torontomi ataatsimeersuarnermi inummik ataatsimik tunillatsittoqarfiusumi peqataasimapput.
Inuit taakku pingasut misissorneqarneranni tunillatsissimanngitsut paasineqarpoq.
Naalakkersuisut Tunillaassortunik nappaalasoqarneranut ataatsimiititaliarsuaq tusagassiortunik ataatsimut katersortitseqqissapput, tassanilu killiffinnik ilisimatitsiniarlutik.
