Misissuinerit inernerisa nunatsinni paasineqarsinnaasnissaat sulissutigineqartoq, nunatta nakorsaanera oqarpoq.Assi: KNR

Nunatta nakorsaanera mittarfinni misissuisarnissamut naaggaartoq

Tamaasa misissussagutsigit isumalluutigut kukkusumik atussavagut, Henrik L. Hansen oqarpoq.

Coronavirusip nunarsuarmi tunillaassuunnera pissutigalugu inuit arlallit nunatsinnut tikeqqammerput, tikittussaallutilluunniit.

Assersuutigalugu efterskoleni atuartut Danmarkimiinnerminni coronavirusimik tunillatsissimagunik nunatsinni tunillaassuutsitsilernissaat ernumagalugu nunatta nakorsaanerata, Henrik L. Hansenip arfininngormat nalunaarutigaa.

Tusagassiortunik ullukkuutaarlugu katersortitsisarnissaq. 

Naalakkersuisut coronavirusi pillugu nunatsinni killifiik tusagassiortunik ullukkuutaarlugu katersuutsitsisarniarput. Ullukkut ataatsimut katersuutsitsisoqartarnissaa pilersaarutaavoq, katersuutsitsinerilli ilaat piffissamut allamut nuunneqarsinnaassapput. Tusagassiortunik katersuutsitsinerit tamarmik knr.gl-ikkut, Facebokkikku quppernertigut, radiokkut tv-kkullu malinnaaffigineqarsinnaassapput.

Taakkuali tunillaatsitsilersinnaasuni kisimiinngitsut, tusagassiortunik sapaatiummat katersortitsinermi oqarpoq.

- Timmisartunik Kalaallit Nunaannut mittoqaraangat tikittut amerlasuujusartut naluneqanngilaq. 270-it tikittussaapput. Efterskolertut taakkunani ikittuinnaapput.

- Aarlerinarnerusoqarpoq, ernummatigisorujussuusatsinnik. Arlallit sivisunerusumik nunani allaneereerlutik Kalaallit Nunaannut uterput, Henrik L. Hansen oqarpoq.

Tikittut tamarmik misissugassamik tigutiffigitinnissaat naaggaaraa

Nunatsinnut tikittut tunillatsissimanermut ersiuteqarnerlutik eqqumaffigissavaat, Nunattalu Nakorsaaneqarfianit inassutigineqartut malissallugit. Inassutit pisut aallaavigalugit nutarterneqartarput Nunatta Nakorsaaneqarfiata nittartagaani atuarneqarsinnaallutik.

Nunatsinnulli tikittut tamaasa misissuiffiginissaat imminut akilersinnaanngitsoq, nunatta nakorsaanerata erseqqissaatigaa.

Ersiutit suuppat?

Coronavirusimik tunillatsissimasut ukuninnga ersiuteqarsimapput:

  • Panertumik quersorneq
  • Kissarneqarneq
  • Anersaartorniarnikkut ajornartorsiuteqarneq
     

Nakorsaaneqarfiup nittartagaatigut annerusumik atuagaqarit

- Nassaarnissap ilimanassusaa mikisuararsuuvoq. Tamaasa misissussagutsigit isumalluutigut kukkusumik atussavagut, Henrik L. Hansen oqarpoq.

- Tunillatsissimanermut ersiuteqartut misissuiffigisarnissaannik periuseqartariaqarpugut, naak ilaat arajutsisinnaallugit nalunngikkaluarlugu, nunatta nakorsaanera oqarpoq.

Danmarkip nunanut allanut killeqarfiisa matunissaat danskit ministeriunerata, Mette Frederiksenip, tallimanngormat aalajangerpaa. Tassalu aamma nunatsinnut angalanissaq matuneqarput.

Taamaalillunilu killeqarfiit nunanit allaneersut nunatsinnut angalaffigisinnaasaat nakkutigineqalissapput.

Danskisut innuttaassusillit - nunatsinneersut Savalimmiuneersullu taakkununnga ilaallutik - nunatsinnut suli angalasinnaapput, nunaniilli allaneersut siunertaqarluartutut aatsaat akuerineqaqqaarlutik nunatsinnukarsinnaallutik.

Coronavirusimik misissuinissamut nunatsinni atortorissaaruteqarnissaq sulissutigigaat

Inuit qulit coronavirusimut tunillatsissimanerlutik tunillatsissimannginnerlutilluunniit pillugit paasisaqarnissaminnut maanna utaqqipput. Ikinnerpaamik arfineq-marluk aqagu paasisaqassapput.

Pissutsit maannatut itsillugit nunatta peqqinnissaqarfia coronavirusimut misissuisinnaavoq. Misissuinerilli inerneri paasineqassappata, misissugassat Statens Serums Institutimut Københavnimiittumut nassiunneqaqqaartariaqartarput.

Tamatumali allanngortinnissaa maanna sulissutigineqartoq Henrik L. Hansen oqarpoq.

- Kalaallit Nunaanni atuutilernissaat qularnanngilaq. Aaqqissuussat maani atortorissaarutigeriikkatsinnut atorneqarsinnaasut naammassinissaat utaqqivagut, Henrik L. Hansen oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat