Tunillatsissimasoq Nuummiippoq. Taanna ilaquttanilu angerlarsimaffimminni mattusimareertuupput, mattusimaannarlutillu. Taakku ulluni 14-ini tulliuttuni angerlarsimaannassapput.Assi: KNR

Misissukkat nutaat inerneri: Coronavirusimik ataasiinnaq suli kisimi tunillatsinnikuuvoq

Nunatsinni misissorneqartut maanna 31-upput. Maannamullu ataasiinnaq coronavirusimik tunillatsissimasoq paasineqarluni.

Nunatsinni coronavirusimik tunillatsissimasoq suli ataasiinnaasoq nakorsaanerup nalunaarutigaa.

Naalakkersuisut tusagassiuutinut nalunaarummi paasissutissiipput.

Kommunini ukunani 31-nik misissugassanik tigusisoqarpoq: Avannaata, Qeqertalik, Qeqqata Sermersoorlu.

Misissukkanit 31-nit 22-t akissutersineqartut, nakorsaanerup paasissutissiissutigaa - taakkulu 22-t tamarmik tunillatsissimanatik.

Qulingiluat suli akissutersineqanngillat.

Maannamulli ataasiinnaq coronavirusimik tunillatsissimasoq paasineqarpoq - tamannalu ippassaq ataasinngornermi paasineqarluni.

AAMMA ATUARUK Nunatsinni inuit 25-t akissutisinissaminnut utaqqisut

Tunillaassortunik nappaalasoqarneranut ataatsimiititaliarsuup innersuussutigaa: 

  • aaqqissuussat inunnit 100-nit amerlanerusunit peqataaffigineqartussat nangaasaarutigineqarluinnarput.

  • nunatsinniit nunatsinnullu sapinngisamik angalasoqassanngilaq. Tamanna nunatsinni angalanermut atuuppoq. 

  • illoqarfinni bussit ilaasunik ulikkaaveqqusaanngillat.

  • timersortarfiit, naluttarfiit sutorniartarfiillu isersimasorisinnaasatik affaannaat isersimatittassavaat. 

  • inuit nunami aarlerinaatilimmeereerlutik nunatsinnut utertut tikinnerminniit ulluni 14-ini tulliuttuni angerlarsimaannaqquneqarput.

  • inuit nunami aarlerinaatilimmeereerlutik nunatsinnut utertut napparsimmavinnut, utoqqaat illuinut illuutinullu allanut aarlerinaateqarfiulersinnaasunut ornigutissanngitsut.

Tunillatsissimasoq Nuummiippoq. Taanna ilaquttanilu angerlarsimaffimminni mattusimareertuupput, mattusimaannarlutillu. Taakku ulluni 14-ini tulliuttuni angerlarsimaannassapput.

- Tunillatsissimasoq nunamut tunillatsinnissamut aarlerinaateqartunut angalasimavoq, angerlamullu tikikkamili angerlarsimaffimminni mattusimaannarsimallutik. Tassunga atatillugu allanut tunillaasoqarnissaanut aarlerinartoqanngilaq, nakorsaaneq, Henrik L. Hansen ippassaq tusagassiortunut katersortitsinermi oqarpoq.

Angerlarsimaffiup avataani tuniluuttoqartinnginnissaa angerlarsimaffimmit aneqqusaannginnerup siunertaraa.

Inuit coronavirusimik tunillatsissimanersut misissorneqartut amerlassusaat nikeraannaavippoq. Nakorsaanerup oqarnera naapertorlugu sineriatsinni aamma misissuisoqartalerpoq, taamaammat Nuummiinnaq kisimi misissugassanik tigusisoqartarunnaarpoq.

Coronavirusimik tunillatsissimasinnaasutut pasitsaanneqartumit misissugassamik tigusisoqaraangat, misissugassaq taanna Københavnimut Statens Serum Institutimut nassiunneqartassaaq. Nunatsinni misissueqqissaarnissamut suli atortorissaarutaateqanngilagut.

 

Isummersuutit