Meeqqat corona pillugu saaffiginnittut: Aneersinnaavugut?
Sumi anersaartuutinut illersuutissarsinnaavugut? Aneersinnaavugut?
Meeqqat coronavirusi pillugu oqarasuaatikkut saaffiginnittarfimmut Tusaanngamut saaffiginnittut ilaatigut taama aperisartut, Qitiusumik siunnersuisarfimmi pisortaq Arnajaraq Poulsen oqaluttuarpoq.
Meeqqat ernumagunik alapernaakkunilluunniit SMS-imik 1899-imut nassiussisinnaapput imaluunniit Tusaanngamut 801180-imut, tassa 801180-imut sianersinnaapput.
Meeqqat coronavirusi pillugu oqarasuaatikkut saaffiginninnissaannut periarfissaqalermatali ulloq ataaseq qaangiuppoq.
Meeqqat siunnersorneqarnissamut pisariaqartitsillutik pingasunngornermi ullup qeqqata siorna saaffiginnissimasut sisamaapput.
- Saaffiginnittut uku amerlanngikkaluartut apeqqutigaat sumi anersaartuutinut illersuutinik pissarsisinnaanerlutik aamma aneersinnaanerlutik, Qitiusumik siunnersuisarfimmi immikkoortortami pisortaq Arnajaraq Poulsen oqaluttuarpoq.
AAMMA ATUARUK Innuttaasut 100-t missaanniittut coronavirusi pillugu saaffiginnittarfimmut saaffiginnereertut
Ullutsinni nittartakkani assigiinngitsuni paasissutissarsiortoqarsinnaavoq, ullunilu makkunani corinavirusimut tunngasut imaaginnavipput. Tamakkualu apeqquterpassuarnik qaffakaatitsipput.
Inersimasut aamma saaffissaqarput
Inersimasut apeqqutissallit oqarasuaatikkut mailikkulluunniit saaffissaqareerput.
- Inersimasut kisimik pisariaqartitsinnginnamik, meeqqat aamma pisariaqartitsigunik paasitinneqarniassammata.
AAMMA ATUARUK Nunatsinni coronavirusimik tunillatsissimasoq alla paasineqartoq: Nuuk matuvoq
Angajoqqaarpassuit nuna tamakkerlugu nualluummut coronavirusimut tunngasut nutaarsiassatigut malinnaaffigaat. Nualluullu pillugu angerlarsimaffimmi eqqartuinerit avaqqukkuminaassinnaapput. Taamaakkaluartoq angajoqqaat maligassiuillutik uippallernaveersaassasut, Arnajaraq Poulsen kaammattuivoq.
- Meeqqat eqqissisimassappata pingaartorujussuuvoq inersimasut takutitsilluarlutik eqqissisimassasut.