Nuuk matuvoq: Nalunaaqutaq 16:00-imiit ima ilioqqusaanngilatit

Kaammattuutaanngilaq – piumasaqaataavoq, Naalakkersuisut siulittaasuat, Kim Kielsen oqarpoq.
Assi © : Nûno Isbosethsen/KNR
Allattoq Christine Hyldal
marsip 18-at 2020 13:37

Nuummi coronavirusimik tunillatsissimasoq alla paasineqarpoq. Taamaalilluni tunillatsissimasut nunatsinniittut marlunngorput – tamarmillu Nuummiillutik.

Kim Kielsen tusagassiortunik katersortitsinermi taama oqarpoq.

Tunillatsissimasoq una sumi tunillatsissimanersoq ilisimannginnatsigu tamatuma immikkuullarequtigaa, nakorsaaneq, Henrik L. Hansen oqarpoq.

- Taamammat inuiaqatigiinni tuniluuttoqarsimalersimaneraniissinnaavugut. Taamaammat tuniluuttoqannginnissaa anguniarlugu tamanik aallartitsivugut. Tuniluuttoqanngilagut maannakkut – taamaattoqalernissaanut pinaveersaartitsilluta taamaaliorpugut, nakorsaaneq oqarpoq.

AAMMA ATUARUK Nunatsinni coronavirusimik tunillatsissimasoq alla paasineqartoq: Nuuk matuvoq

Taamaammat Nuuk maannakkut ualeru sisamanit sapaatini-akunnerni pingasuni tassa apriilip arfineq-pingajuannut matussaaq.

- Inuit maanngarsimasut sapaatini-akunnerni marlunni angerlarsimaqquneqarput. Taamaattoqartuaannanngilarli, inuillu mianersunnginnerat uggornarpoq. Aninaveersaassaasi. Angerlarsimaannaritsi. Tamanna kaammattuutaanngilaq – piumasaqaataavoq, Kim Kielsen oqarpoq.

Inerteqquteqarneq Nuummut kisimi atuuppoq, nunattalu sinneranut atuunnani. Matumani innersuussutit pineqanngillat, inerteqquteqarnerullunili.

Nuummi ualimut sisamat kingorna ima ilioqqusaajunnaassaatit:

  • Inuit amerlanerpaamik qulit ataatsimoorsinnaapput. Tamanna illup iluani silamilu atuuppoq. Tamanna maannamut 100-inut killeqarsimagaluarpoq.
  • Inerteqquteqarneq pisortat ilaasartaataannut atuutinngilaq. Bussini issiavissat tamarmik atorneqarsinnaapput. Aamma pisiniarfinni inuit qulinit amerlanerusinnaapput.
  • Ilinniarfeqarfiit ulluuneranilu paaqqinniffiit matupput. Atuarfiit tallimanngorpat aatsaat matusussaagaluarput – matusinerli ullumikkut sisamanit aallartissaaq.
  • Nuuk Center matuvoq
  • Qitigiartarfiit imerniartarfiillu matupput
  • Neriniartarfiit aamma neriartortunut matoqqassapput. Taakkuli annissanik pisiniarfigineqarsinnaanissaat periarfissaassaaq.
  • Timersortarfiit - matumani timigissartarfiit ilanngullugit matupput.
  • Nuummiit aamma aallarsinnaanngilatit – aamma nammineq umiatsiannik. Aqisserniarsinnaavutit aalisariarsinnaallutillu – kisianni Nuummut angerlaqqittassaatit. Sumiiffinnut allamukaqqusaanngilluinnarputit.
  • Pisiniarfiit ammaannassapput – pisinialli imminnut 2 meterinik ungasitsigisassapput.
Nutaarsiassami kukkunermik nassaarsimaguit uunga allaffigineqarsinnaavugut.

Aamma atuaruk