Lars-Emil: Naalagaaffeqatigiinneq kigaatsumik ajortikkiartorpoq
Folketingimi ukiumoortumik oqallinneq sisamanngornermi aallartippoq. Partiit oqaaseqartittagaat tamarmik oqaaseqareermata apeqquteqaatit akineqarput. Ilaasortaatitatta aatsitassat nunatsinnit iluanaarutigineqarsinnaanerat eqqaavaat. Nunatta Danmarkillu akornanni nutaamik isumaqatigiissusiornissaq pisariaqalersoq aamma eqqaaneqarpoq. 1992-imi Savalimmiormiut danskillu isumaqatigiissutaannit ajornerusariaqanngitsoq Kuupik Kleistip erseqqissarpaa.
- Nunarsuarmi avatangiisit ministeriunerup ammaalluni oqalugiarnermini eqqaanngimmagit eqqumiingaara. Issittoq tamarmi avatangiisinut pingaaruteqartorujussuuvoq nunatsinnilu nukissiuutaasinnaasunik ulikkaarpoq. Danmarkimi naalakkersuisut mingutitsinnginnerusunik nukissiorfinnik pilersitsiortuineranni iluaqutaasinnaapput, Kuupik Kleist oqarpoq.
Ministeriunerup naalagaaffeqatigiinnerup iluani pitsaasumik ingerlasoqarneranik oqarnera Lars-Emil Johansenip ippinnartoqartippaa.
- Pissutsit piviusuminngaanniit allaanerupput. Naalagaaffeqatigiinneq kigaatsuaqqamik ajortikkiartorpoq, paarlattuanilli nunatta namminiilivinnissamik suliniarnera pitsaasumik ingerlavoq, Lars-Emil Johansen oqarpoq.
- Danskit naalakkersuisuisa nunatta Savalimmiullu ineriartortinneqarneri sulissutigisariaqarpaat. Free Association tamatumani atorneqarsinnaavoq, Lars-Emil Johansen oqarpoq.