Kommunit tamarmik meeqqat atuarfiat pillugu suleqatigiinniartut
Suliniummi nakkutilliisuutitat suliniut oqaluttuarisaanermi pingaarutilittut taavaat. Ilinniartitseriaatsit nutaat, ilinniartitsisut pikkorissarneqarsimasut, atortullu atuartitsinermut naleqqussarneqarlutillu pitsaanerulersinneqarnissaat suliniutaalluni.
- Pilersaarut annertooq, suliniullu pisariaqartinneqartoq uani pineqarpoq, atuartullu ilinniartitsisullu nunatsinniittut piginnaasaasa ineriartortinneqarnissaat neriuutaalluni, Maliina Abelsen, suliniummi nakkutilliisuutitat siulittaasuat oqarpoq.
AAMMA ATUARUK Tuluit oqaasiisa sallinngortinneqarnissaannut eqqarsaatigisassarpassuaqarpoq
Atortut teknologiskiusut digitaliusullu qitiusut
Atortut teknologiskiusut digitaliusullu suliniummi qitiupput. Atuartut ilinniartitsisullu tamarmik Ipadimik tunineqassapput. Atuartitsineq IT aqqutigalugu ingerlanneqarnerulissaaq, atuartullu ilinniartitsisullu tassuunatigut nunap iluani nunanilu allani pissutsinut ilisimasaqarnerulissapput, atortunillu ilinniartitseriaatsinillu avitseqatigiinnerulersinnaassallutik.
Suliniut ukiuni tallimani ingerlasussatut pilersaarutigineqarpoq, aningaasaateqarfinniillu tallimanit katillugit 50 millionit koruuninik aningaasalersorneqarluni. Taassuma saniatigut kommunit tallimat katillugit 165 millionit koruuninik aamma aningaasaliissapput.
Allatulluunniit oqaatigalugu: Meeqqat atuarfianni atuartoq ataaseq ukiut tallimat tulliuttut ingerlanerani ukiumut 5000 koruuninik aningaasaliiffigineqassaaq.
Inuiaqatigiinni ineriartorneq ilorraap tungaanut ingerlassappat meeqqat atuarfiata pitsanngorsaavigineqarnissaa pingaaruteqarnerpaanut ilaasoq, inuiaqatigiinni susassaqartut assigiinngitsut qasseerpassuariarlutik oqaatigaat.
AAMMA ATUARUK Sulisitsisut IMAK-ilu atuarfinnik ataatsimut sulissuteqarusuttut
Kalaallit Nunaanni meeqqat atuarfiata pitsanngorsaavigineqarnissaa pingaaruteqarluinnartoq, IMAK-ip Sulisitsisullu Peqatigiiffiata GE-p inatsartunut qineqqussaartoqarnerata nalaani oqaatigaat. Aningaasaqarnermullu Siunnersuisoqatigiit qasseerpassuariarlutik aamma oqaatigaat meeqqat atuarfiat inuiaqatigiit ineriartortinnissaannut pingaaruteqarluinnartoq.
AAMMA ATUARUK Ilinniagaqassutsip qaffassarnerata siuariartorneq sukkanerulersissavaa
