Sulisitsisut IMAK-ilu atuarfinnik ataatsimut sulissuteqarusuttut

Meeqqat inuusuttullu maannimiut siunissami inuussutissarsiornissamut piukkunnarsillutik ilinniagaqartartut ikippallaaqaat. Taamaattumik GE IMAK-ilu aalajangersimasumik isumaqalersitsiniarlutik politikerinut paasititsiniaaniarput.

-Meeqqaat atuarfiat iluatsissinnaanngikkaanni, taava takornariartitsineq aatsitassarsiorneq  inuussutissarsiutillu allat eqqarsaatigalugit avataaniit sulisussanik eqqussuigaluttuinnassaagut, GE-mi pisortaq Brian Buus Pedersen oqarpoq.

Sisamanngornermi tusagassiortunik katersuutitsinermi ilinniartitsisut kattuffiat IMAK Nunatsinni atuarfiit qanoq ilillutik atuarfinni angusartakkat kivinneqarsinnaanerannut kajumissaatinik politikerinik aalajangersimasunik isumaqalersitsiniarlutik suliatik saqqummiuppaat.

AAMMA ATUARUK Qeqertalik kinguussaaqqasoq

Peqqutissaqaramillu qineqqusaarnerup nalaani aalajangersimasunik isumaqalersitsiniarneq saqqummiuppaat.

- Taama iliornermut peqqutaasunut ilaavoq politikerit qineqqusaarnerup nalaani meeqqat atuarfiat eqqartortarmassuk, ilaannikkullu qinersereernerup kingorna iliuutsinik amingaateqartarlutik, IMAK-ip siulittaasua Birthe Møller Therkelsen oqarpoq.

GE'p aamma IMAK-ip aalajangersimasunik isumaqalersitsiniarnerat Nunatsinni meeqqat atuarfianni pitsanngorsaatissanik pilersitassanik assigiinngitsunik aqqaneq marlunnik imaqarpoq.

Kattuffiit taakku marluk ilaatigut kissaatigaat ilinniartitsinermi atortut pitsanngorsarnissaat, meeqqat atuarnerannut angajoqqaat akuutinneqarnerunerat, isorliunerusuni pitsaanerusumik atuartitsineq atuarfinnilu aqutsisut piukkunnaateqarnerusut.

AAMMA ATUARUK Ilinniarneq imminut akilersinnaasoq

Aalajangersimasunik isumaqalersitsiniarnerinut aamma siunertaavoq politikerit takutinniarlugit, GE aamma IMAK ilinniartitaanerup pitsanngorsarnissaanut akuutinneqarusukkamik.

- Takutikkusupparput suleqatigiissinnaalluta. Assigiinngitsorpassuit pillugit isumaqatigiippugut. Politikerinik suleqatiserinninnermut peqqutaavoq meeqqat atuarfiata ilinniartitaanerullu eqqartuiffiginerinut peqataarusunnerput, GE-mi pisortaq Brian Buus Pedersen oqarpoq.

AAMMA ATUARUK Meeqqat atuarfiini siusinaartumik iliuuseqartoqarli