Kunngu Simonsen Nuummut erniartussaaq anaananilu ilagisinnaanngilaa
Ernisarfik matoqqippoq. Qaqortumi ernisarfik ukiup ataatsip sinnerlugu ingerlanerani pingajussaanik matugallarpoq, tamanna pissutigalugu nunatta kujataani ernisussat illoqarfiit pingaarnersaannukarlutik erniartortariaqaleqqipput.
Tamanna nunatta kujataani illoqarfiit annerpaartaanni pilattaasussaaleqisoqaleqqinneranik pissuteqarpoq.
Tamannalu ilaqutariinnut meeraaraatitaangajalersunut sunniuteqarpoq. 24-nik ukiulik, Kunngu Simonsen siullermeerluni ernisussaq taakku ilagaat.
Nuummut erniartortussaanera pissutigalugu aappaa erninissaanut kisimi peqataasinnaavoq. Kunngu Simonsen siulliulluni aallassaaq aappaalu kingornatigut tikissalluni.
- Uanga aamma neriukkaluarama maani ernissallunga, kisiat Nuummeeqqusaavunga, taanna oqarpoq, nangillunilu:
- Ilaquttakka ilagerusukkaluarpakka, ingammik anaanaga, kisianni ilaasinnaanngillat, angutaatiga kisimi ilaasinnaagami.
Kunngu Simonsenip erninissaa januaarip 22-anut killiligaavoq, taamaammat ukiortaartinnagu Nuummukassaaq.
Angalaneq uippakajaartitsisinnaallunilu annilaangalersitsisinnaasoq
Ernisarfik aasaq juunip aallaqqaataanit juunip 17-iani matoqqagallarpoq. Tamanna sioqqullugu 2022-mi aggustimit 2023-mi januaarimut qaammatini tallimani matoqqavoq. Ernisarfik maannakkut septembarip 27-anit matuvoq.
Ernisussiortut Kattuffiata Qaqortumi napparsimmaviup ernisarfimmik matusisariaqartarnera arlaleriarluni isornartorsiornikuuvaa.
Kattuffiup siulittaasuata angalaneq piffissami ulapiffioreersumi kingunerluuteqangaatsiarsinnaasoq ukioq manna siusinnerusukkut oqaatiginikuuaa.
- Ilisimavarput erniartorneq anaananngortussanut ernumarujussuarnermik uippakajaarnermillu kinguneqartartoq, aamma tamanna naartuumut sunniuteqartartoq ilisimavarput. Timimmi hormonii qisuariartarput tamannalu naartuumut sunniuteqartarpoq, Ernisussiortut Kattuffiata siulittaasua, Charlotte Bøgelund, oqarpoq.
Qaqortumi ernisarfiup matoqqanerani ernisarfiit atuuttut tassa Nuummi, Ilulissani, Sisimiuni Tasiilamilu sisamaannaalerput. Nunatsinni ernisarfiit siunissami marluinnaalernissaat, peqqinnissaq pillugu ataatsimiititaliarsuup upernaaq siunnersuutigaa.
Peqqinnissamut naalakkersuisuusimasup, Mimi Karlsenip tamanna itigartitsissutiginikuuaa.
- Qaqortumi napparsimmaviup nunap immikkoortuani napparsimmavittut atuunneranut annikillisaanissamik pilersaaruteqanngilagut, taanna siorna oqarpoq.
Ernisussiortut Kattuffiata isumassarsiaq taanna aamma isornartorsiornikuuaa:
- Eqiterussisariaqarluta oqaannarsinnaanngilagut. Nunatsinni ernisarfiit Nuummi Ilulissanilu kiserngorutsinneqaraluarpata inissaqartitsisoqanngilaq, Ernisussiortut Kattuffiata siulittaasua, Charlotte Bøgelund ernisarfiup matoqqinneqarnerata nalunaarutigineqarnerani oqarpoq.
Ernisussat qulingiluat Nuummukartinneqassasut
Qaqortumi ernisussat ukioq manna pingajussaanik Nuummukartinneqaqqittariaqalernerannut napparsimmavimmi pilattaasussaaleqinermik pissuteqarpoq. Peqqinnissaqarfimmi nakorsaq qullersaat, Aviaja Siegstad KNR-imut oqarpoq.
- Ernisussiortoqassaaq, sinitsitsisartoqassaaq pilattaasartoqarlunilu. Taakku pingasut eqquutsinneqanngippata, ernisarfiit pitsaassusaat isumannaatsuunissaallu qulakkeersinnaanngilarput, taanna oqarpoq.
Taamaammat peqqinnissaqarfiup ernisarfiup ammaqqissinnaanissaa pissutigalugu pilattaasussarsioqqissaaq. Qaqortumi nunattalu kujataani ernisussat tamatuma utaqqiisaannik Nuummut erniartortariaqartassapput.
Ernisarfik septembarip 27-anit matuneqarallarpoq, tamatumalu kingorna nunatta kujataani ernisussat qulingiluat Nuummi erninissaminnut neqeroorfigineqareerput.
Qaqortumi napparsimmaviup ernisarfik ukiup sinnerani matoqqanissaa naatsorsuutigineqarpoq, peqqinnissaqarfimmilu qullersat ernisarfiup qaqugu ammaqqissinnaanissaa piffissami matumani oqaatigisinnaanngikkallarpaat. Pilattaasartumik piffissami sivikitsumi Qaqortumut januaarimi suliartortoqassaaq, taassumali ernisussat suliarinavianngilai.
