Ukiup aappaata affaani pingajussaanik: Naartusut Qaqortup Napparsimmaviani ernisinnaanngitsut
Nunatta kujataani ernisussat Nuummut Dronning Ingidip Napparsimmavianut erniartornissamut innersuunneqaqqittalerput.
- Ernisarfiup pitsaassusaanik qulakkeerinissamut aalajangersimasunik piumasaqaateqarnerput pissutigalugu Qaqortumi ernisarfik matoqqagallarpoq, Peqqinnissaqarfimmi nakorsaq qullersaat, Aviaja Siegstad KNR-imut oqarpoq.
Ernisarfik ukiup ataatsip sinnilaarnerata ingerlanerani pingajussaanik matuvoq.
Ernisarfik aasaq juunip aallaqqaataanit juunip 17-iani matoqqagallarpoq. Tamanna sioqqullugu 2022-mi aggustimit 2023-mi januaarimut qaammatini tallimani matoqqavoq. Ernisarfik maannakkut septembarip 27-anit matoqqassaaq.
- Ernisussiortoqassaaq, sinitsitsisartoqassaaq pilattaasartoqarlunilu. Taakku pingasut eqquutsinneqanngippata, ernisarfiit pitsaassusaat isumannaatsuunissaallu qulakkeersinnaanngilarput, Aviaja Siegstad oqarpoq.
Taamaammat peqqinnissaqarfimmi qullersat nunatta kujataani pilattaasartumik atorfinitsitsinissartik sukataaruppaat. Suliassarli tamanna ajornaatsuunngitsoq, nakorsat qullersaat oqarpoq.
Atornitsitsiniarneq ilungersunartoq
Peqqinnissaqarfimmi qullersat Qaqortumi pilattaasartussarsioraangamik pilattaasartup pilattaanermi piginnaasat pisariaqartut pigisariaqarpai, tamatumalu saniatigut nakorsiartitsisartutut aamma atuutissalluni.
- Ullumikkut pilattaasartuugaanni pilattaanermi suliaqarfigerusutamik toqqaasoqartarpoq, Aviaja Siegstad oqarpoq.
Danmarkimi peqqinnissaqarfiit sulisussarsiorfigineqarajuttut siusinnerusukkut napparsimaveerarpassuusarput, tassani nakorsat nakorsiartitsinermi assigiinngitsunik suliassaqartarput, Aviaja Siegstad nassuiaavoq. Maannali taamaaliortoqarsinnaanngilaq.
Qaqortumi ernisarfiup matoqqanerani ernisarfiit atuuttut tassa Nuummi, Ilulissani, Sisimiuni Tasiilamilu sisamaannaalerput. Nunatsinni ernisarfiit siunissami marluinnaalernissaat, peqqinnissaq pillugu ataatsimiititaliarsuup upernaaq siunnersuutigaa.
Siunnersuut isornartorsiorneqarnikuuvoq. Siorna peqqinnissamut naalakkersuisuusup, Mimi Karlsenip naalakkersuisut ernisarfinnik ikilisaanissamut pilersaaruteqanngitsut oqaatigaa.
Ernisussiortut Kattuffiata siunnersuut aamma isornartorsiornikuuaa. Peqqinnissaq pillugu ataatsimiititaliarsuup innersuussuteqarnerata kingorna aamma suli isornartorsiuipput.
- Eqiterussisariaqarluta oqaannarsinnaanngilagut. Nunatsinni ernisarfiit Nuummi Ilulissanilu kiserngorutsinneqaraluarpata inissaqartitsisoqanngilaq, Ernisussiortut Kattuffiata siulittaasua, Charlotte Bøgelund oqarpoq.
Peqqinnissaq pillugu ataatsimiititaliarsuup innersuussutaat peqqinnissaqarfimmi qullersat isiginngitsuusaanngilaat. Sunali pitsaanerpaasorineraat ersarinngilaq.
- Eqqarsaatiginikuuarput, kisianni piffissami matumani Qaqortumiittoq inuttalerniarsarivarput, politikkimmi tungaaniit ammatitsinissaq suli anguniagaammat, Aviaja Siegstad oqarpoq.
Ajornartorsiutaasoq qanoq aaqqiissuteqarfigissavarput?
Qaqortumi ajornartorsiutaasup qanoq aaqqiivigineqarsinnaanera pillugu Charlotte Bøgelund aperigaanni politikerit peqqinnissaqarfimmi sulilersitsinissamut pilerinarsaanerussapput.
- Isumaqarpunga suliffimmi atugassarititaasut, suliffimmi avatangiisit akissarsiaqartitsinerlu misissortariaqarivut. Tamanna aaqqiivigineqartinnagu atorfinitsitsisinnaanngilagut, sulisullu kalaallit peqqinnissaqarfiini tunngaviusussat attanniarsinnaanngilagut, taanna oqarpoq.
Aviaja Siegstadip oqarnera naapertorlugu nakorsamik Qaqortumi atorfinittoqarniariartoq pitsanngorsaatit tamarmik aallartissapput.
- Taamaalilluta aamma ilaatigut sulinngiffeqarsinnaaneq suliffiullu avataani inuuneqarsinnaaneq angussavarput. Qaqortumi inuuneqartoqalissaaq, aamma eqimattat imminnut attanniarnissaminnut periarfissaqassapput, taanna oqarpoq.
Qanoq tamanna anguneqassava?
- Atorfinitsitsiniartarfipput aqqutigalugu atorfinitsitsiniaannarnissarput apeqqutaavoq.
Qaqortup napparsimmaviani pilattaasartumut atorfiup inuttalerneqarnissaa piviusorsiorpa?
- Qangaliunngilaq, tamanna iluatsissinnaasimammat, inuit ataasiakkaat apeqqutaalluinnarput. Inuimmi ikittuinnaat pineqarput. Piffissami tamanna iluatsissinnaasoq ilimagivarput, kisianni siunissami taamaaliortoqartuaannarsinnaanngeriataarnissaa isiginiarparput, Aviaja Siegstad oqarpoq.
Qaqortumi napparsimmaviup ernisarfi ukiup sinnerani matoqqanissaa naatsorsuutigineqarpoq, peqqinnissaqarfimmilu qullersat ernisarfiup qaqugu ammaqqissinnaanissaa piffissami matumani oqaatigisinnaanngikkallarpaat. Pilattaasartumik piffissami sivikitsumi Qaqortumut januaarimi suliartortoqassaaq, taassumali ernisussat suliarinavianngilai.