VIDEO Kujallermi eqqagassanik navianaatilinnik isumaginninneq pitsaavallaanngitsoq
- Qaammatini qaninnerni peerneqassapput. Sulisutta qanoq suliassaqartiginerat naapertorlugu tunulliuttariaqarsimavagut. Maannali containerimut inissinneqassapput, Kommune Kujallermi teknikkimut avatangiisinullu ingerlatsivimmi ingerlatsinermi pisortaq Anders Mathiassen KNR-imut taama oqarpoq.
Nappartat ilarpassui ukiuni 15-ini uninngaannarsimapput manngertornilersimallutillu, taamaammallu tupinnanngitsumik seerilersimapput.
- Pingaartumik puui manngertorneriartortaramik silataatigut,
taamaalinerisigullu seerisoqalertarluni. Immaqalu aamma aputaajaanikkut imaluunniit arlaatigut serlersaarfigineqalaarnikkut puui aqilisareernikut taamaalillutik seerisalersarlutik.
AAMMA ATUARUK Kujallermiut saliilersut
- Kommunilli puigorsimanngikkai, Anders Mathiassenip erseqqissaatigaa.
Kommune Kujalliup sullissivik.gl-imi quppernerani atuarneqarsinnaavoq avatangiisinut navianartut avatangiisinut navianartunut tigooraavinnut Qaqortumiittunut, Narsarmiittunut Nanortalimmiittunullu tunniunneqarsinnaasut.
- Pisortat ingerlataanni eqqagassalerineq tassaavoq, igitassaativut sumununa igittarniarigut. Igitassatta illersorneqarsinnaasumik isumagineqarnissaat pingaaruteqartuuvoq, taamaanngippammi ajornerpaamik kingulimmik mingutsitsinermik nappaatinillu pilersitsisoqarsinnaammat, kommuni taama allaaseriaqarpoq, maligassiuisuunissanili paasisimannginnguatsiarpaa.
AAMMA ATUARUK Kommune Kujalleq qorsoorusuppoq
Sullissivik.gl-imi aamma atuarneqarsinnaavoq avatangiisinut navianartut imikkoortiterneqartartut, tamatumalu kingorna Danmarkimi suliareqqitassatut nassiunneqartarlutik.
Avatangiisinut tunngatillugu akisussaaffilimmik iliortoqarsimannginnerata saniatigut, nappartat pineqartut illunut qaninnernut meterinik 100-innarnik qanitsigisumiillutik takussunaqutaapput.