Kommune Kujalleq qorsoorusuppoq

-Avatangiisit pillugit sulinitsinni eqqakkanik suliaqarneq aamma sammisaqaarput. Qaqortumi ikuallaaveqarpoq, kommunillu kattunnerisigut illoqarfiit marluk ilanngummata, qanoq atorluarsinnaanerlugu maanna misissorparput, Brger Kristoffersen oqarpoq.

Tassalu maanna misissorneqarpoq, assersuutigalugu Narsamiit eqqakkat Qaqortumi ikuallaavimmut assartorneqarsinnaanersut.

Tassalu suut ikuallanneqarnersut nakkutigineqarsinnaapput, kiallu pilersinneqartoq illunik kiasssaanermut atorneqarsinnaalluni, kissarsuutinik uuliatortunik aamma taamaalilluni atuineq millisillugu.

Kommunip aamma misissorniarpaa, avatangiisinut asattuarnerusumik sanaartortoqarsinnaanersoq.

- Kommunip illuliarititai tamarmik kiffiusersorluagaassasoq aammalu tamakkunani seqernup kiaanik atolluaanissaq assigisaalluunniit piumasaqaatigineqarsinnaavoq. Aammani inuit namminneq seqernup kiaanik ukiorpassuarni atorluaaniareerput, arkitekti oqarpoq.

Kommunit nutaat tamarmik ineriartornermi sinaakkusiisussamik kommunimut pilersaarusiortussanngorput, taamaaliornermilu avatangiisit eqqarsaatigineqarsinnaapput, Birger Kristoffersen inassuteqarpoq.

Qaqortormiu Arne Kyed Birger Kristoffersenitulli isumaqarpoq, inuit avatangiisinik asattuussinerannut Kujataata qorsooqinnersua peqqutaasoq.

- Ukiut qulit 15- it qaangiuttulli misileraalluta aallartippugut. Inernerilu takussaaleraangata isumassarsiaq siarualertortarpoq.

Atuarfiup aammaarsimaatarfiani ukiorpassuit qaangiuttut seqinermut innaallagissiuutinik aallartippugut, aallaarsimaartarfillu tamarmi nukissiuutinik nungujuitsuinnarnik manna atortoqarpoq. Ilisimagaaralu, inummiit inummut unnersiuteqattaanneq iluaqutigalugu avatangiisinik illersuineq siaruarsimasoq, Arne Kyed oqarpoq.

Arne Kyedip suliffiutaa, Solarventi-Grønland, seqernup qinngornerinik iluaquteqarluni kiassaatinik illunullu silaannarissaatinik tikisitsisarpoq.