Kujallermiut saliilersut

Eqqakkanik tipiliortitsilluni ikuallaasarneq kangerlunnullu kuutsitsisarneq Kommune Kujalleq unitsinniarneqalerpoq.
marsip 11-at 2014 04:01

Avatangiisinut Pinngortitamullu Naalakkersuisup Kim Kielsenip aamma Kommune Kujallermi Borgmesterip Jørgen Wæver Johansenip politikkikkut siunertanut nalunaarut kommunini isumannaatsumik eqqagassalerinermut aqqutissiuussisussaq ippassaq atsiorpaat.

Siunertanut nalunaarut Kommune Kujallermi eqqaavissuarni saliinermik aamma isumannaatsumik ikuallaasarnermut aaqqiissutissanik pilersitsinermik kinguneqassaaq, tamatumalu kingorna suleqatigiinnermit misilittakkat nuna tamakkerlugu ullutsinnut naleqqunnerusumik isumannaannerusumillu eqqagassalerisarnermut tunngavissaliissapput.

- Eqqagassalerineq kommunit akisussaaffeqarfigaat, taamaattorli kommunit kisimik suliassarujussuaq taanna isumagissanngilaat, uangalu peqqinnissamut peqqissutsimullu ulorianartorsiortitsisumik innuttaasunut qanilluinnartumi ammaannartumik ikuallaasoqartarnera akuerisinnaanngilara. Isumaga malillugu pinngortitaq najugarput asseqanngilaq, taannalu paarissavarput. Peqqissuserput pinngortitarlu eqqarsaatigalugit malugineqarsinnaasumik avatangiisini pitsanngorsaanernik pilersitsinissaq tassa nukinginnarluinnarpoq, Kim Kielsen oqarpoq.

Illoqarfinni nunaqarfinnilu eqqagassanik isumaginninnerup pitsaangorsaavigineqarnissaa, isumaqatigiissummi pineqarpoq.

Avatangiisinut aningaasaateqarfimmik pilersitsinissaq sulissutigineqassasoq Inatsisartut aalajangerput. Avatangiisinut aningaasaateqarfiup 2015-imiit atuutilernissaa naatsorsuutigineqarpoq. Aningaasaateqarfimmut isertitassat avatangiisinut akitsuutinit pissarsiarineqassapput. Aallaqqaammut akitsuutit nukissiornermut tunisassianut akitsuusiussaareersut atorneqassapput. Siunissami aamma tunisassianut avatangiisinut ajoqusiisartunut allanut aamma avatangiisinut akitsuusiisarnissaq atuutsinneqalissasoq naatsorsuutigineqarpoq. Avatangiisinut aningaasaateqarfik taamaalilluni avatangiisinut akitsuutit aamma avatangiisini pitsanngorsaataasunik suliniutinut atorneqartarnissaannut qulakkeereqataassaaq.