Danmarkimut tikittut mattusimasalissasut

Danmarkimut tikittut tamarmik aqagumiit februaarip arfineq aappaanniit ullut qulit mattusimasalissapput, ullullu qulit qaangiunneranni coronamullu misissortittarlutik.

Taanna februaarip ulluisa 28-ata tungaanut atuusissasoq, assartuinermut ministeriaqarfik tusagassiuutinut taama nalunaaruteqarput.

Danmarkimut umiarsuakkut, killeqarfikkut timmisartukkulluunnii tikinneq apeqqutaanani mattusimanissaq misissortinnissarlu tamanut atuuppoq.

Tikinnermiit ullut sisamat qaangiunneranni misiligummik tigutiffigitinnermik coronamut ersiuteqanngikkaanni matusimaannarnissaq atorunnaarsinnaavoq.

Maleruagassanik unioqqutitsinermi akiligassiisoqarsinnaasoq

Nunanit allaniit Danmarkimut timmisartukkut tikittut tamaavimmikmittarfimmiit ingerlaqqinnginneranni piaarnerpaamik misissortittassapput. Nutaarsiassaqartitsivik Ritzau taama allappoq.

Ilaasut tikittut mittarfimmi utaqqinerminni naammagittartariaqartassasut, Københavnip mittarfiani ilaasoqarnermut pisoqartaq, Susanne Rose Plum, DR-imut oqarpoq.

- Maanna piumasaqaataalerpoq, tassa misissortinnissamut piffissaq sivisunerusoq atorlugu utaqqisariaqartalissapput, passilu atorlugu misissuisarfimmi aamma misissortittassallutik, taanna oqarpoq nangillunilu:

- Atortorissaarutit inissinniarlugit ulapputigaagut. Atortorissaaruteqarnissarput toqqissisimanarpoq, taamaasilluta tikittut tamarmik misiliummik tigusiffigisinnaaniassagatsigit. Oqartussanillu misissorneqareerunik mittarfimmiit ingerlaqqissinnaassapput.

Peqqussummik unioqqutitsisoqarnikkut 3500 koruunini akiligassiisoqarsinnaavoq.