Arnat U19-it Canadamut ajorsarneratigut nunarput VM-imut anngutinngitsoortoq

U19-ini unammisartut unikkallarnissap tungaanut siuarsimagaluarlutik VM-imut anngunniunnermi ajorsarput.

Allattoq Victoria Julie Schou

juulip 21-at 2025 15:30

Nunatsinnit nunanut allanut unammisartut U19-it VM-imut anngunniuteqataajunnaarput.

Anngunniunnermi aalajangiisussamik nunaminni unammisunut Canadameersunut unamminerminni 28-23-mik ajorsarneratigut tamanna pivoq.

Unikkallarnissap tungaanut nunatta siuaqqanera neriunaateqarluaraluarpoq, unamminerulli aappaani Canadamiut arnartaasa sukataarneratigut nunarput ajugaaffigineqarpoq.

Nunarput anngunniunnermi 3-nngorpoq - anngunniunnermilu pitsaanerpaat marluk taamaallaat ingerlaqqittussaapput.

Taamaammat Canada USA-lu tassa 1-nngortoq 2-nngortorlu ukioq manna kingusinnerusukkut nunarsuarmi pissartanngorniuteqataassapput.

Naalli nunarput Canadami Drummondvillemi sapaatini akunnerni kingullerni katersuuffiusumi Canadamut ajorsaraluarluni unammiuaarnermi takutitsilluaqattaarpoq.

Anngunniunnermi Puerto Ricomut aamma Saint Kitts and Nevisimut ajugaapput - taaneqartumullu kingullermut unamminerminni 81-2-mik ajugaallutik - kiisalu unamminermi allani Mexicolu naligiipput USA-mullu ajorsarlutik.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.