Borgmesteri Disko Line pillugu ersarissaaqqusisoq

Disko Linep kiffartuussinermi isumaqatigiissummi atuuttumi pisussaaffini suli malinnerai nalilersorneqaqqullugit, Avannaata Kommuniani borgmesteri, Lars Erik Gabrielsen (S) Namminersorlutik Oqartussanut saaffiginnissuteqarnermini kaammattuuteqarpoq.

Taassuma saaffiginnissuteqarnera tusagassiuutitigut minnerunngitsumik Sermitsiakkut ukkatarinninnerusoqarneranik aallaaveqarpoq. Ilanngutassiat ilaanni Disko Line A/S-ip niuernermut pisortaata, Nóelle Simoudip isornartorsiuineq umiarsuaatileqatigiiffiup takornariaqarnermik suliaqarnera najukkani takornariartitsisunut pisortanit tapiiffigineqarneq ajortunut naliginngitsumik unammilleqatigiinnermik pilersitsinermut tunngasoq oqaaseqarfigaa.

Lars Erik Gabrielsenip suliffeqarfiup pisussaaffini – pingaartumik 2025-mi inuttaasut takornariallu pisariaqatitaannut tunngasoq suli malinneraa naliliiffigeqquaa.

Disko Linep suliffeqarfik marloqiusamik sammiveqartumik tassa tamanut kiffartuussisutut niuernermullu tunngatillugu takornarianik angallassisutut ingerlatsinera Sermitsiamut siusinnerusukkut oqaaseqarfigaa. Tamannali borgmesterip isornartorsiorpaa:

- Isumaqatigiissutip piumasaqaataasa ersarissuunissaat nutarterneqarnissaallu kissaatigaarput. Pingaaruteqarpoq qulakkeernissaa, pisortanit tapiiffigineqarnermik malitseqartunik isumaqatigiissutit naligiinngitsumik unammilleqatigiinnernik pilersitsissanngitsut, Lars Erik Gabrielsen tusagassiuutinut nalunaarummi tallimanngornermi ualikkut allappoq.

Taassuma isumaqatigiissut ukiut tallimat matuma siorna isumaqatigiissutigineqartoq piffissamut kommunillu pisariaqartitaanut suli naleqqunnersoq apeqquserpaa. Taamaammat politikikkut erseqqissaasoqarnissaa siammasinnerusumillu oqallittoqarnissaa kaammattuutigalugu:

- Aatsaat suleqatigiinnikkut ersarissumillu siunnerfeqarnikkut pitsaanerusunik aaqqiissutissanik pilersitsisinnaalissaagut – taamatullu takornarialerisoqartarnikkut najukkani inuiaqatigiinnut piorsaaneq qulakkeersinnaassallutigu, taanna tallimanngormat oqarpoq.

Suliarli sapaatip akunnerata naanerani pisoqarfioqqippoq, Ilulissani innuttaasut takornariaqarnerup illoqarfimmi qanoq ineriartortitsinera pillugu akerliussutsimik takutitsinissamik isumaliutiginnittut Facebookikkut atuarneqarsinnaavoq.