Nuummi namminersortunik nakorsiartarfeqalersinnaavoq

Naalakkersuisut nunatsinni namminersortunik nakorsiartarfiliorsinnaanissap misissorneqarnissaa 2023-imiilli aalajangereerpaat. 

Maannalu tamanna siunissami periarfissaalernissaanut alloriaqqittoqarpoq.

Naalakkersuisut nunatsinni peqqinnissakkut suliassaqarfiup iluani namminersortutut siammarterneqarnissaanut periarfissat pillugit nassuiaat Inatsisartunut agguaateqqammerpaat. 

Nassuiaat taanna peqqinnissaqarfiup pitsanngorsarnissaanut attavigiuminarnerulernissaanullu suut aaqqiissutissaqqinnerussanersut politikkikkut sukumiisumik oqallisiginissaannut tunngavissiisussaassaaq, Peqqinnissamut Inunnullu Innarluutilinnut Naalakkersuisoqarfik tusagassiuutinut nalunaarummi taama allappoq.

Misissuineq Nunatsinni Inuiaqatigiit Peqqissusiannik Ilisimatusarfimmit suliarineqarpoq, tassanilu periutsit assigiinngitsut pingasut, namminersortumik kiffartuussinermut tunngasut misissorneqarput.

- Peqqinnissakkut inuttut naligiinnginneq assigiinngitsumik annertussusilimmik annertuseriarsinnaassasoq, misissuinermi taakkununnga tamanut tunngatillugu naatsorsuutigineqarpoq.

Periutsilli taakku pingasut tamarmik tamat peqqinnissaqarfiata tatisimaneqarneranik assigiinngitsumik annertussusilimmik oqilisaassinnaanermut periarfissaqartitsipput.

Peqqinnissaqarfik tatisimaneqartoq 

kigutilerisutut namminersortutut ataatsimik timimillu sungiusaasutut namminersortutut arlalinnik ingerlatsisoqarneratigut orninneqarsinnaasunik assersuutissaqareerpoq. Nakorsatut namminersortutut suli ingerlatsisoqalernikuunngilaq, tusagassiuutinut nalunaarummi allanneqarpoq.

- Inatsisitigut periarfissaalereeraluartoq, tamatumani inatsimmi tunngavissat namminersortutut ingerlatsisut aamma peqqinnissaqarfiup pisortanit ingerlanneqartup akornanni suleqatigiinnermut aamma tunngasortaqanngillat, Naalakkersuisoqarfik tusagassiuutinut nalunaarummi allappoq.

Taamaattumik misissuinermi nutaami namminersortumik kiffartuussinissamut periutsit pingasut misissorneqarput. 
Siulleq tassaavoq ataqatigiissitsilluni ingerlatsineq, tullia tassaalluni pituttorsimanngitsumik ingerlatsineq, kiisalu kingulleq periutsit taakku marluk akuleriisinnerisigut suleriaaseqarneq.

- Ataqatigiissitsilluni ingerlatsinerup tamat peqqinnissaqarfiat oqilisaassinnaavaa napparsimasullu ingerlaavartumik kiffartuunneqarnerat nukittorsarlugu, kisiannili sullitassat, aningaasaqarneq suleqatigiinnerlu pillugit erseqqissunik aaqqissuussaanikkut tunngavissaliisoqarsimappat tamanna pisinnaavoq, misissuinermi tamanna allassimavoq. 

Politikkikkut periuseq sorlerluunnit pilersikkumaneqaraluarpat, tamanna siullermik misiliutaasumik killilimmik aaqqissuussinertut ingerlanneqartariaqartoq, misissuinermi erseqqissumik oqaatigineqarpoq

Nuuk nunatsinni kisiartaalluni nakorsatut namminersortutut ingerlatsiffiusinnaanera illoqarfiup taassuma inuisa amerlassusaannik tunngaveqartoq, nassuiaammi erseqqissarneqarpoq. 

Politikkikkut sukumiisumik oqallisiginninneq

Namminersortunit kiffartuussinerit tamat peqqinnissaqarfiata oqilisaannissaanut ilapertuisinnaasut, Atassutip tungaaniit 2023-mi peqqinnissaq pillugu isumaqatigiissummi erseqqissumik oqaatigineqarpoq.

Dronning Ingridip Napparsimmavissuani nakorsiarnissamut piffissamik pissarsiniarneq ajornakusoorsinnaasoq, tamatumuunalu namminersortunik nakorsiartarfeqarneq ikiuutaasinnaasoq, Partip ilaatigut tikkuarpaa.

Namminersortunik peqqinnissakkut kiffartuussinissamut periarfissat qinikkat qaqugu oqaluuserissaneraat, tusagassiuutinut nalunaarummi ersinngilaq:

-Nassuiaat taanna peqqinnissaqarfiup pitsanngorsarnissaanut attavigiuminarnerulernissaanullu suut aaqqiissutissaqqinnerussanersut politikkikkut sukumiisumik oqallisiginissaannut tunngavissiisussaassaaq.