Akuersissuteqartoqartoq: Qaqortumi mittarfik ullumi ammassaaq
Mittarfik nutaaq Kujataani Qaqortup eqqaaniittoq timmisartumut ilaasunik tikilluaqqusisinnaanngulerpoq.
Angallannermut Aqutsisoqarfiup isumannaallisaanikkut pissutsit naammaginartutut nalilerpai, taamaalilluni timmisartoq Nuummeersoq siulleq sisamanngornermi nalunaaqutaq 08.55 missinnaanngorpoq.
- Misissueqqissaareerluta misileraanermilu mittarfik isumannaallisaanikkut piumasaqaatinik naammassinnittutut akueraarput, timmisartortitseqatigiiffiup pisortaanera, Peter S. Adams oqarpoq.
- Tamanna isumannaallisaanikkut nakkutilliinermut nutaamut, timmisartut pillugit paasissutissiinermut digitaliusumut mittarfimmullu 1500 meterinik takitigisumut tunngatillugu atuuppoq, Trafikstyrelsenimi pisortap tullia Lars Korsholm oqarpoq.
Piumasaqaatilli arlallit tunngavigalugit akuersissutiginnittoqarpoq, timmisartullu piffissami siullermi akunnermut amerlanerpaamik marloriarlutik missinnaanissaat Air Greenlandillu kisimi atuisuunissaa ilaatigut piumasaqaataavoq.
Mittarfinni sulisut misilittagaqarnerujartortillugit nakkutilliinerillu pilersaarutit naapertorlugit pippata piumasaqaatit qasukkarneqarsinnaapput.
Sapaatip-akunneranut timmisartuussinerit arlallit
Qaqortumi mittarfik Amerikamiut Narsarsuarmi sakkutooqarfiusimasumut, angalasunut ukiut 60-it sinnerlugit mittarfiusimasumut, taartissatut siunertaavoq.
Icelandairip Narsarsuarmi mittarfik siornatigut atortarsimagaluarlugu, Københavnimut Keflavíkimullu sapaatip akunneranut arlaleriarluni juunimiit timmisartuussisalernissani naatsorsuutigaa.
Ilulissat eqqaanni mittarfissap nutaap ukioq manna kingusinnerusukkut atulernissaanut akuersisoqarnissaa atorneqalernissaalu naatsorsuutigineqarpoq.
Mittarfiit nutaat Nuummilu mittarfik nutarsarneqaqqammersoq peqatigalugu Kalaallit Nunaanni attaveqarnermut angallannermullu pitsanngorsaassapput aningaasaqarnikkullu ineriartortitsillutik, ilaatigut takornariaqarnerulerneratigut.
Timmisartoq siulleq Nuup tungaanut sisamanngornermi nalunaaqutaq qulinut aallannginnerani ammaanersiorneq nalliussineqassaaq.
Aammattaaq illoqarfiup katersortarfiani kaffillertoqassasoq, Greenland Airports Facebookimi allappoq.
/ritzau/
