Naalakkersuisut ulluni 100-ni sulinerat pillugu illuatungiliuttunit isornartorsiorneqarput

Naalakkersuisut ulluni 100-ni maannamut sulinerat Naleqqamit arajutsineqarani isornartorsiutinik puttallartitsivoq. 

Qinigaaffimmi matumani kisiartaallutik illuatungiliuttut tusagassiunut nalunaaruteqarput, Naalakkersuisut piffissartik qallunaanut aallartitanut, sakkutooqarnikkullu tikeraartitsinernut kiisalu suleqatigiinnissamut isumaqatigiissutinut piffissartik atornerugaat. 

-Maanna ullut 100-t qaangiussimalerput naalakkersuisoqatigiit pissaaneq neriorsuuterpassuartalik tigummassuk, inuiaqatigiilli neriorsuutinik annertuunik suli maannamut pissarsinngillat.

-Susoqarpa taava? Pissutsit maannamut isorineqartartut allannguuteqanngillat, partii tusagassiutinut taama allappoq. 

Demokraatit qineqqusaarnermi aalisarnermut inatsisip allanngortinnissaa kiisalu pinngitsaalissummik soraarnerussutisiassanik ileqqaarsinnaatitaanerup atorunnaarsinneqarnissaanut tunngasut Naleqqamit tikkuartorneqarput. Taakkuali isaannit susoqarsimanngitsoq oqaatigineqarluni. 

Pakatsiffiuvoq 

Naalakkersuisut siulittaasuata Jens-Frederik Nielsenip KNR-imi marlunngormat apersorneqarnermini oqaatigaa, aalisarnermut inatsit allanngortinneqassanngitsoq, nalunaarutitulli ilusilimmik ilassutissatut siunnersuummik ilanngussisoqarsinnaasoq. 

-Ullut 100-jut siulliit ingerlaneranni takussutissiivoq, allanngornissamik iluarsaaqqinnisamillu kissaatit eqquutitinnagit qitiusumik aqutsineq atanerulernerlu atuutilerseqqinneqartut, Naleraq tusagassiutinut taama allappoq. 

Partiip paasisinnaannginerarpaa, sooq Naalakkersuisut pinngitsaaliissummik soraarnerussutisiassanik ileqqaarsinnaatitaaneq pillugu suliaqarsimannginnersut, taannami suliarineqarsimasuuppat nunatsinni ilaqutariippassuit aningaasaqarnerat oqilisaaffigineqarsinnaalluarmat, nioqqutissammi ulluinnarni pisariaqartitat orsussallu akia akitsoraluttuinnarput.  

Qanoq ilillutik innuttaasut aningaasaqarnikkut pitsaanerusumik angusaqarsinnaappat, naalakkersuisut ilaqutariit aningaasaqarnerannut oqilisaanianngippata, partii aperivoq. 

Naleqqap allagai naapertorlugit naalakkersuisoqatigiit nassuiaataat utoqqatsissutaallu qatsulluinnarpaat. Partii naalakkersuisoqatigiinniit susoqartariaqartoq piumasaqarpoq. 

-Ullut 100-jut pitsanngorsaavittut atorluarsinnaagaluarput, maannamulli pakatsinerpassuit amerlavallaaqaat. Tamannalu uggornarpoq, Naleraq naqissusiivoq.