Meeqqat atuarfianni ilinniartitsisoq: Atuartitsissutigineqartartut amerlavallaarput

Ilinniartitaanermut Naalakkersuisup Nivi Olsenip meeqqat atuarfianni nukarlernut atuartitsissutigineqartartut ikilinissaat pilersaarutigaa. Tamanna Qeqertarsuarmi meeqqat atuarfianni nukarlernut ilinniartitsisup Pilúnguak Jeremiassen-ip misilittakkani tunngavigalugit taperserpaa.

Allattoq Miki Fleischer

juulip 18-at 2025 13:23

Meeqqat atuarfianni nukarlernut atuartitsissutaasut amerlammata, atuartut tunngaviusumik allassinnaanermut atuarsinnaanermullu ilikkariartorsinnaassusaannut akornutaasoq, KNR-ip ullualuit matuma siorna oqaluttuaraa.

Aamma atuaruk Ilinniartitaanermut Naalakkersuisoq: Nukarlerni atuartitsissutit ikilineqassapput

Ilinniartitaanermut Naalakkersuisup atuartut nukarlernut atuartitsissutit ikilisinneqarnissaannik Nivi Olsenip siunniussaa, Qeqertarsuarmi meeqqat atuarfianni nukarlerni ilinniartitsisup Pilúnguak Jeremiassen-ip taperserpaa.

- Isumaqarpunga iluartorujuussasoq nukarliit eqqarsaatigalugit. Nukarlernik ilinniartitsisuuvunga. Fagerparujuit atuartitsissutigisarpakka. Malugisinnaasarpara nukarlernut fagit amerlavallaartut.

Sammisassanut assigiinngitsunut nuuttaqattaarneq

Meeqqat atuarfianni nukarlernut ilitsersuutigineqartartut amerlavallaarneri pissutaallutik, atuartut nukarliit kalaallisut allassinnaanissaq atuarsinnaanissarlu tunngaviusumik ilikkarluaqqaarnagit sammisassanut allanut saattartut, taanna oqarpoq.

Aamma atuaruk Immikkut ilisimasalik: Kalaallisut atuarsinnaaneq allassinnaanerlu atuartut nukarliit pingaarnertut ilikkagassaraat

- Una eqqarsaatigalugu: tunngaviusumik namminneq oqaatsitik iluamik ilikkarluarnagit fagit allat ilinnialereertaramikkit. Soorlu, alloriarfiup tullianut alloriartarput tunngaviusumik oqaatsinik ilinniarluarnissaat suli pisariaqartissimagaluarlugu. Soorlu allanniarnikkut, atuarniarnikkut kingaalaarlutik. Taamaammat isumaqatigivara, fagit ikilisinneqarnissaat.

Sammisassani sivisunerusumik ilinniartitsinissaq

Pilúnguak Jeremiassen-ip isumaa naapertorlugu, atuartut ukiumut ilikkagassai amerlammata, atuartitsissutinut assigiinngitsunut nuuttaqattaartarput. Taamaammat ilinniartitsisut sammisani ataasiakkaani immikkut sivisunerusumik itinerusumillu ilinniartitsinissaminnik periarfissaqanngillat.

- Anguniagassat taakku tamaaviisa anguniarniaranni piffissarujussuaq atorneqartariaqarpoq ilikkartitsilluassagutta. Atuartut sammisanut pulalluassappata soqutiginnillutik malinnaasinnaallutik namminerlu iliuuseqarsinnaassagunik, piffissaq annertooq atortariaqartarpaat. Sammisamiit sammisamut allamut nooqattaartinnerini ilikkarniarnerat kigaannerusarami.

Ilinniartitaanermut naalakkersuisup siunniussaatut atuartitsissutit ikilineqarnissaannik suliaq aallartinneqassappat, meeqqat atuarfianni nukarlernut ilinniartitsisut suleqataanissaat Pilúnguak Jeremiassen-ip aamma neriuutigaa.

- Uaguulluni iluassooq, tikilluta tusarniaaffigineqarutta immaqa pilersaarusioqataasunut ilaatinneqarluta. Nammineq atukkagut nalunnginnatsigit, maani piffimmi qanoq pisariaqartitsinerluta. Taava iluassooq ilinniartitsisut tikillugit aamma isumasioqatigiittoqaruni arlaannilluunniit ilinniartitsisut toqqaannaq peqataatillugit, Pilúnguak Jeremiassen taama oqarpoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.