Danmark nakkutilliinissamut droninik ungasissumut ingerlaarsinnaasunik sisamanik pisisoq

Dronit ungasissumut ingerlaarsinnaasut sisamat danskit illersornissaqarfiannut tunniunneqassapput.

Illersornissamut ministereqarfimmit tusagassiuutinut marlunngornermi nalunaarummi tamanna atuarneqarsinnaavoq.

Dronit Issittumik Atlantikullu avannarpasissuanik nakkutilliinerunermut atorneqassapput.

Illersornissamut ministereqarfik ministereqarfiullu atortunut pisiortornermullu aqutsisoqarfia FMI tusagassiuutinut nalunaarutini taama allapput.

Dronit Natop pisiortornermut aqutsisoqarfiatigut isumaqatigiissummut ilaapput.

- Illersornissaqarfiup nunarsuarmi sillimaniarnermut politikkikkut pissutsit ullormiit ullormut allanngorarsinnaaneranni malinnaasinnaanissaa pingaaruteqarpoq, illersornissamut ministeri Troels Lund Poulsen (V) oqarpoq.

Timmisartutut isikkoqarsinnaasut

Dronit Accelerationsfondenimit aningaasanik politikkikkullu isumaqatigiissutaareersunit aningaasalersorneqassapput.

Dronit MQ-9B SkyGuardianiupput. Danskit Issittumi Atlantikullu avannarpasissuani nakkutilliinerusinnaanerannut pingaaruteqartut FMI allappoq.

Dronit suluusaat 24 meterinik isorartussuseqarput, dronillu ungasisumut ingerlaarsinnaasut 12 meterinik takissuseqaramik timmisartutut isikkoqarsinnaapput.

Dronit nutaaliaasunik malussaateqartut signalinillu katersisinnaanermut atortorissaaruteqartut isorartoorujussuarmi nakkutilliisinnaasut, nunarsuarmilu silarluffiunerpaasinnaasartuni atorneqarsinnaasartut, FMI allappoq.

Europa nammineernerusinnaasariaqarmat, droninik pisillutik, illersornissamut ministereqarfik allappoq.

- Tamanna tamatumunnga alloriarnermut aalajangiisuulluinnarpoq. Droninik ungasissumut ingerlaarsinnaasunik sisamanik pisineq Danmarkimut Europamullu isumaatsuunerulersitsivoq. Tamatumunnga ilutigitillugu Natomut ilanngussaqarnerunissarput sulissutigineqarpoq, Troels Lund Poulsen oqarpoq.

Sukkassuumik periuseqarneq illersornissaqarfiup akiuussinnaanerulersinnissaanut pingaaruteqartoq, illersornissaqarfimmi pisortaq Michael Wiggers Hyldgaard isumaqarpoq.

- Taamaammat droninik ungasissumut ingerlaarsinnaasunik tunniussinissamut maanna isumaqatigiissusioreerneq pitsaasuuvoq, tusagassiuutinut nalunaarummi oqarpoq.

Dronit 2028-p 2029-llu akornanni tunniunneqarnissaat naatsorsuutigineqartoq, FMI allappoq.

Danskit droninik aqutsisussat USA-mi dronit atulinnginneranni sungiusaqqaassasut, FMI allappoq.