Jess Svane nassuerpoq: Kommunit kattunneqarnerat kukkuneruvoq
Nuna tamakkerlugu innuttaasut kommunerisaminni oqartussaaqataanerorusupput, kommunalbestyrelsillu sulinerat pillugu iluarisimaarinninnerat appasippoq.
Kommunit aaqqissuussaanerat pillugu naliliinermi, qaammatip aallartinnerani saqqummertumi takuneqarsinnaavoq.
Jess Svanep tupaallaatiginngilaa:
- Tassa tupaallaatiginngilara inuit iluarisimaarinninnermut tunngatillugu apersuineq ingerlanneqareernarata inernera.
Iluarisimaarinninnginneq aarlerinarpoq
Kommunit aaqqissuussanerat pillugu naliliinerup inerneri aaqqissuusseqqittoqartariaqarneranik tikkuussivoq.
Taamaammat Jess Svane sulinissaminut piareersimavoq:
- Tassami inerniliineq tassunga pisimappat taava allannguineq pisariaqarsimavoq ilaa isumaalunnartumik aarlerinaatilimmik oqaasertaqarpoq una taanna imaannaanngittuuvoq, oqarpoq nangillunilu:
- Taamaammat tassunga ingerlaarnerput kommuninik aaqqissuusseqqinnissamut taanna sammivigisariaqarparput innuttaasut iluarisimaarinninginnerat oqariartuutaappat
Kommunit 2009-imi 18-iujunnaarlutik sisamaannanngortinneqarput. Allaffissorneq marloqiusaasoq ataasiinnanngortinneqarnissaa, innuttaasullu qanimut oqartussaaqataanerisa nukittorsarneqarnissaa ilaatigut siunertarineqarluni.
Siunertarineqartorlu iluatsissimanngittoq, Jess Svanep nassuerutigaa:
- Siunertaq taanna naammassineqanngitsutut isigivara maannamut aamma marloqiusamik allaffissorneq ataasiinnanngortussatut siunniutaagaluartoq massakkut nikinngilaq, oqarpoq nangillunilu:
- Immaqaluunnniit marloqimmik allaffissorneq annertuneruliinnarpoq tassa ilaa orninniangaq tikinngittoorneqarpoq taamammat oqarpunga iluatsinngilaq.
Inatsisartut akisussaaffik paaraat
Innuttaasut oqartussaaqataanerorusunnermik kissaateqarnerat, kommunalbestyrelsillu sulinerannik iluarisimaarinninnginnerat tusaaniarlugu, naalakkersuisuniit suliniuteqarlutik Jess Svanep oqaatigaa.
- Piviusorsiussuungut aaqqiissutissaq pitsaanerpaaq massakkut ujartorniarlugu suleqatigiissitaq pilersipparput aamma una massakkut tigoreeratsigu aamma annerusumik sakkussaqalerpugut, kissaatigineqarpoq iluarsartuusseqqinneq pisariaqartoq aamma ullumerniit pitsaanerusumik tamat oqartussaaqataanerat aaqqissuunneqaqqittariaqartoq uani kissaatigineqarpoq, taanna oqarpoq.
Kommunillu avinneqaqqissappata Inatsisartut tamanna aalajangigassarigaat, naqissusiivoq:
- Qanoq kommunit isikkoqarusunnertik qanoq amerlatigerusunnertik taamanikkussamut soorunami inatsisartutigoortumik aalajangiiffigineqarnissaa taanna siunertaasussaavoq allanngortissinnaajunnaarlugu ingerlavik massakkut isumaqarpunga ingerlavigileripput. Naalakkersuisoq Jess Svane naggasiivoq.
