Malik Berthelsenip naliliinermi inerniliissutit tupaallaatiginngikkai
Kommunip aaqqissuussaaneranik nalilersuineq Isumaginninnermut Naalakkersuisumit, Jess Svanemit, sivisuumik utaqqineqarlunilu kissaatigineqarpoq.
Taanna nunatta kommuniinut tallimanut sapaatip akunnerata siuliani saqqummiunneqarpoq.
Nunap kommuniini arlalinni naammagisimaarinninnginneq annertuvoq. Kommunit annertuallaartut ungasippallaartullu sunniuteqarnissaminnut, innuttaasut taama isumaqarput.
Qeqqata Kommuniani borgmesterip Malik Berthelsenip nalunaarusiaq atuareerlugu tamanna aamma paasisaqarfigaa.
- Naammagisimaarinninnginneq tassa illoqarfinni borgmesteriutitaqarfiunngitsuni annertunerpaanera taanna maluginiarnarpoq.
Kiffartuussinerlunneq iliuuseqarfigineqanngitsoq
Kommunit aaqqissuussaanerat pillugu nalilersorneqarnissaat Inatsisartut naalakkersuisunut 2022-imi peqqussutigaat.
Naliliinermilu nuna tamakkerlugu kommunalbestyrelsit sullissinerat innuttaasunit iluarisimaarineqarnera appasippoq, tamannalu aarlerinartutuut nalilerneqarpoq.
Taamaakkaluartoq borgmester Malik Berthelsenip taamatut inerniliineq isumaqatigivallaanngilaa:
- Pisuni suniluunniit pisuutitassat ajornannginnerpaat siullerpaallu tassaasarput politikerit qinikkatut sulisut taamaammat tupaallaatiginngilara taamatut nalilerneqarnerput.
Maniitsumi innuttaasut Qeqqata Kommunianit peqataatinneqanngitsutut misiginertik pissutigalugu avissaarnissartik siorna maajimi kissaatigaat.
Tamannali kommunalbestyrelsimiilli amerlanerussuteqartunit itigartitsissutigineqarpoq.
Kisianni Malik Berthelsenip naammagisimaarinninnginneq kommunip sullissineranut toqqaannartumik tunngassuteqanngissoraa:
- Naammagisimaarinninnginnermut tunngatillugu tassa uanga isumaqarpunga sullissinermut toqqaannartumik tunngassuteqanngikkaluarluni ungasianinngaanniit aqunneqarnermik misigisimanermik tunngaveqarsorivara tassa illoqarfiit borgmesteriutitaqarfiusut nunaqqatiginngisaminnik aqunneqarnerattut misigisimaneq taanna nuannarineqannginneranniissorivara uanga.
Innuttaasut namminneq akisussaaffeqartut
Kommunini kiffartuussineq nuna tamakkerlugu naammagisimaarutigineqanngitsoq ersarippoq, Qeqqata Kommunianili borgmesterip innuttaasut namminneq aamma pitsanngorsaanissamut akisussaaffeqarsorai.
- Tassa eqqaamassavarput ajornartorsiutigut inuttut nammineq pissusilersuutitsinnit aallaaveqarput taavalu ajornartorsiutigut annikillisissagutsigit taava aamma nammineq ileqqutsinnik allanngortitsisariaqarpugut ajornartorsiutit annikilliartussappata.
Qeqqata Kommunianilu kommunalbestyrelsimi suliarineqartut aalajangiiffigineqartullu suunerinik innuttaasunut apuussisarnissartik pikkoriffiginagu Malik Berthelsenip nassuerutigaa.
- Suliatta imaluunniit aalajangikkatta suuneranik innuttaasunut apuuttarnissaanut taanna pikkorinnerusariaqarnerput taanna nassuerutigisinnaavara.
Maniitsoq Qeqqata Kommunianit avissaarnissamik kissaateqarpat innuttaasut aalajangiisuussapput, Malik Berthelsenillu suliaq qinigaaffiup tulliani aatsaat naammassineqarsinnaasoq ilanngullugu oqaatigaa.
