Avaaraq Olsenip Kommuneqarfik Sermersuup avinnissaa ammaffigigaa
Nunatsinni kommunit tallimanngorlugit 2009-mi kommunerujussuanngortinneqarput, tamannalu innuttaasut akornanni naammagittaalliutigineqartarpoq.
Tasiilami innuttaasut Kommuneqarfik Sermersuumiit avissaarnissartik ukiuni arlaqalersuni aamma kissaatigaat.
Kommuneqarfik Sermersuumilu alloriarneq tulleq pissappat, kommunalbestyrelsemi ilaasortat Tunumeersut alloriaateqarnissaat borgmesterip Avaaraq S. Olsenip utaqqiniarpaa.
- Tassa innuttaasuniikkami kissaat, qanoruna oqariartuut uanga kommunalbestyrelsemi ilaasortat qanoq oqaluuserisassanngortissanersoq soorunami utaqqimaartariaqassavara borgmesteritut.
Allannguinissamik sulissuteqartut
Tasiilap Kommuneqarfik Sermersuumiit avissaarnissaanut maannakkut iliuuseqarsinnaanngikkaluarlutik, Nuup avataani illoqarfinni annertunerusumik akisussaaffilersuillutik borgmesterip oqaatigaa.
Tamanna Nuup avataani illoqarfinni nunaqarfinnilu innuttaasut oqartussaaqataanerulertutut misiginissaannut iluaqutaaqataaniartussaassaaq.
Tassa soorlu Tasiilami Paamiunilu taamaaliorlutik, borgmesterip Avaaraq S. Olsenip oqaatigaa:
- Kommunip immikkoortortaqarfiini pisortaasimasut kommunimi nunap immikkoortuini pisortanngortippagut oqartussaaffiit akisussaaffiit annertusarlugit aningaasartalimmik, taanna oqarpoq nangillunilu:
- Aamma nunaqarfinnut toqqaannaq sullissisinnaaneri annertusarlugu, taava aamma organisationip iluani suliffeqarfiit iluani aamma suli annertunerusumik atorfilittanut oqartussaaffinnik siammarterinissarput massakkut sulissutigivarput.
Allatigut naammagisimaarinnittut
Innuttaasut oqartussaaqataanerorusunnerat kommuninit arlalinnit kommunit aaqqissuussaanerat pillugu naliliinermi maluginiarneqarpoq.
Avaaraq S. Olsenillu aamma tamanna naliliinermit uppernarseqqippaa. Tamannali aamma illuatungeqartoq, tassa innuttaasut aamma sutigut naammagisimaarinninnersut maluginiarsimagini, taanna erseqqissaavoq.
- Illuatungaani paasivarput innuttaasut naammagisimaarinninnerat sumiinnersoq, soorlu sunngiffimmi susassaqartitsinerit uagut kommunitsinni atuarfinnut tunngatillugu aamma naammagisimaarinninnerat annertuvoq, taanna aamma oqarpoq.
Kommuneqarfik Sermersuumi sunngiffimmi sammisassaqartitsinikkut naammagisimaarinninneq annertugaluartoq kommunalbestyrelsemi allatigut pitsanngorsagassaqarnerarpaa.
- Assigiingitsunik peqquteqartoq uagut isumaliorpugut, qinigaaffik nutaami suli annertunerusumik qinikkatut sulinissamut pikkorissaanerit ingerlanneqassassut taakkua kommunalbestyrelsemut tunngapput, kisianni aamma nunaqarfinni aqutsisunut taavalu aamma najukkami ataatsimiitsitalianut ilaasortanut tunngatillugu.
