Kommunit avinneqarpata suleqatigiinnissaq kaammaattuutigaa
Kommunalbestyrelsenut marlunngornermi qinersisoqareerpat avannaani kommuneni marlunni ikaarsaariarnermut ataatsimiititalianik marlunnik 32-nik ilaasortaqartunik toqqaasoqassaaq. Kommune avannarlermi ikaarsaariarnermut ataatsimiititaliaq 17-nik ilaasortaqassaaq, avannaani kommune kujallermi 15-nik ilaasortaqassalluni.
Ikaarsaariarnermut ataatsimiititaliat qaammatit arfineq pingasut tulliuttut ingerlaneranni kommunit marluk ilusilersorneqarnissaannut periarfissaqarput. Kommunit avinneqarnerat pissaaq aappaagu jannuarip ulluisa aallaqqaataanni.
AAMMA ATUARUK Qaasuitsup Kommuniani inuusuttorpassuit unittooqqasut
Kommunenut Nunaqarfinnut Isorliunerusunullu Naalakkersuisup Múte B. Egedep suleqatigiilluarnissaq kaammattuutigaa, - ikaarsaariarnermut ataatsimiititaliap kommunip qanoq aaqqissorneqarnissaa suliarissavaa taasumalu saniatigut ikaarsaariarnermut ataatsimiiititaliap soorunami naalakkersuisunut assigiinngitsutigut suleqateqarnissaminut kissaateqarnera aallaavigalugu suleqataalluarumaarpugut, Múte B. Egede oqarpoq.
Avannaani kommuunit avinneqarnissaannut kissaatigineqartut pingaarnersaat tassaavoq innuttaasut oqartussaqataanerisa nukittorsarneqarnisasat.
AAMMA ATUARUK Qaasuitsumi ajornartorsiutit kommuninut nutaanut ingerlateqqinneqalersut
Múte B. Egedep oqarnera naapertorlugu kommunenut aqutsinermit inatsisip allanngortinneqarneratigut ataasiakkaat sunniuteqarsinnaanerisa pitsaanerulernissaat Naalakkersuisunit suliniutigineqaleruttorpoq, - kommuunimik avitsinissamik pisoqalernera tunngavigalugu Inatsisartuni ukiaru ataatsmiinnissamut Naalakkersuisut massakkut Kommuninut aqutsinermi inatsisip nutartigassap suliarileruttorparput, Kommunenut Nunaqarfinnut Isorliunerusunullu Naalakkersuisup Múte B. Egede oqarpoq.
