Qaasuitsup Kommuniani inuusuttorpassuit unittooqqasut

Kikkulluunniit ilinniagaqarnissamik suliffissaqarnissamillu periarfissaqartussaasut, Qaasuitsup Kommuniata nittartagaani allassimavoq.

Taamaakkaluartoq kommunimi tassani inuusuttut 15-init 24-nut ukiullit sisamararterutaat ilinniarfissaqanngillat ingerlariaqqinnatillu.

Kommunillu ajornartorsiutaa iluarsiartunngitsoq, ilinniagaqalernissamut Ilulissani suliffissaqalernissamullu piareersartarfimmi Majoriami pisortaq Thora Siegstad oqarpoq.

Inuusuttummi ingerlariaqqinnissaannut periusissiortoqarsimanngilaq.

- Meeqqat atuarfiannit aninermit ilinniagaqalernissamut iliuusissamut pilersaarut tamakkiisumik aallartinneqarnikuunnginnera patsisigitittarpara, Qaasuitsup kommuniani Majoriami pisortaq Thoras Siegstad taama oqarpoq.

Qaasuitsup Kommuniani inuusuttut 15-init 24-nut ukiullit 334-t februaarip qaammataani suliffissarsiortutut nalunaarsorneqarput, tassalu inuusuttut sisamararterutaat naparliinnaqqapput.

Ajornartorsiullu kommunimut qinersinissamut sassartut ippassaq sammilluarpaat.

Inuusuttunut iliuusissat pillugity periusissiornissamik kommuni naammattumik ilungersorsimanngitsoq, qineqqusaartut ilaata nassuerutigivaa.

- Inuusuttut 16-init 25-nut ukiullit amerlavallaartut Qaasuitsup Kommuniani annaavagut, IA-meersoq Nuka Kleemann oqarpoq.

Iliuuseqarnissarlu tullinnguuttoq Demokraatineersoq Lena Ravn Davidsen isumaqarpoq.

- Inuusuttut 15-init 24-nut ukiullit mikisuunerannit iliuuseqarneq pingaarnerpaarpaavoq, Lena Ravn Davidsen oqarpoq.

Inuusuttullumi suliassaqartinneqartariaqarput, kisianni:

- Eqqaamassavarput inuusuttunut praktikkerfissaqartitsineq ajornartorsiutaammat, Partii Naleqqameersoq Anthon Frederiksen taama oqarpoq.

Inuusuttulli amerlanerusut ilinniarlutillu sulissappata suliffeqarfiit ikiuuttariaqarput.

- Majoriami suliffissanik pilersitsisinnaanngilagut, kisianni inuussutissarsiortunik suleqateqarnikkut inuusuttut praktikkerfissaannik pilersitsinikkut inuusuttut suliffissaaleqinerannut annikillisaaqataasinnaavugut, Qaasuitsup Kommuniani Majoriami aqutsisoq Thora Siegstad taama oqarpoq.

Qaasuitsup Kommuniali kisimi taama ajornartorsiuteqartuunngilaq.

- Kalaallit Nunaanni inuusuttut 4000-it missaanniittut 16-init 24-nut ukiullit uninngapput, Kalaallit Nunaanni systemerput arlaatigut kukkusimavoq, taamaattumik arlaannik iliuuseqartariaqarpugut, Siumut sinnerlugu Qaasuitsoq avannarlermi kommunalbestyrelsimut qinigassanngortittoq, Palle Jerimiassen, Ilulissani qineqqusaartoqarnerani ataasinngornermi taama oqarpoq.