Maniitsoq kommunimit avissaarusuttoq: Soorluuna ernumalersitsissasoq, ilisimatusartoq oqarpoq
Illoqarfimmik kommunimut atanissaa atannginnissaaluunniit innuttaasut namminneq aalajangigassarinngilaat. Taamaassimasuuppat Qeqqata Kommuneqarnerani tunngaviulluinnartut peernerat kommunimik uppisitseqqajaqaaq.
Maniitsumi innuttaasut amerlanerussuteqartut atsiorneri kommunalbestyrelsemut borgmester Malik Berthelsenimik (S) siuttoqartumut sisamanngormat apuunneqartut eqqarsartitsilaavissimassapput.
Innuttaasut kommunimiit avissaarusuttut 1.065-iupput. Avissaarusunngitsut 14-iinnaasut.
Naallu kisitsisit innutaasut angorusutaannik erseqqissumik takutitsigaluartut, piviusunngornissaa ilimananngilaq. Ilimanannginneranut pissutaavoq, kommuninik aaqqissuusseqqinnerit, Kalaallit Nunaanni Danmarkimilu pinikut, tassaalersimammata, inoqarfiit amerlanerit kattullutik kommunerujussuanngortiternerat. Avissaartoqarsinnaassaaq, kisianni tungaanut tamaviaarnartut arlaqassaqisut, Roger Buch, Danmarkimi tusagassiornermik ilinniarfimmi (Danmarks Medie- og Journalisthøjskole) kommunit pillugit ilisimatusartoq oqarpoq.
Aqqutissaq nalunartoq
Avissaarniaraanni piareersaatit annertussaqaat.
Ilumut piviusunngorsinnaanersoq, kommunalbestyrelsep atuuttup misissorteqqaassavaa allaaseritillugulu, oqarpoq.
- Eqqarsartungaana, avissaarsinnaanermik misissuinissaq imaaliallaannaq, kommunalbestyrelsep itigartitsiinissaq aalajangiuppagu, unitsinneqariaannaasoq, Roger Buch oqarpoq nangillunilu:
- Kisianni aamma, misissuisoqarnerata periarfissaasoq takutikkaluarpaguluunniit, ilumut ulluinnarni kisimiilluni illoqarfik napasinnaassanersoq apeqqutaassaaq. Akuersisussallu tassaapput Naalakkersuisut. Misissuineq aallartikkaanni piviusunngortinnissaata tungaanut suliaq sivisussaqisoq takorloorsinnaavara, aqqutissaq nalunassaqimmat, aammalu piviusunngortinnissaa ilimanarpallaanngimmat.
Qanga inuuneq pitsaanerugallarmat
Kommunerujussuit 2009-mili pilersinneqarmatali Maniitsoq puigugaasutut misigiuaannarsimavoq.
- Kommunerujussuanngornitta kingorna qinikkat ungasissorujussuarmik pissuseqalerput. Taavalu tamatuma kingunerisaanik qularnanngilluinnartumik Maniitsormiut misigisimaleraluttuinnarsimallutik tusarniarneqassanatik, isummersorfigineqassanatik paasissutissanillu anngussiffigineqassanatik, Hendrik Stach atsiortitsinernik katersinermik aallartitsisoq innuttaasunik ataatsimiisitsinermi upernaaq KNR-imut oqarpoq.
Naammagittaalliorneq atsiortitsiortornerup takutitaa, maajumi juunimilu aallartippoql Kommunerujussuanngornermi ingerlatseriaaseq pitsaajunnaarsimavooq. Qanga ingerlatsinermut uterusupput. Kisianni, kommuni pissutsinik ilisimatusartoq oqarpoq:
- Qanga inuuneq pitsaanerusoq nassaassaajunaareerpoq. Kommunini kommunerujussuanngornerit kingorna pisoqarsimaqaaq, soorlu innuttaasut najugaqariaasiat, inuussuutissarsiutinik inerisaaneq aamma allarpassuit siornatigutut ikkunnaarsimapput. Qanga inuunerisimasamut utiinnartoqarsinnaasorinngilara, oqarpoq.
Itisuumik tiguneqarli
Maniitsumit qanittukkut avissaarneqarsinnaaneq borgmesterip ernummatigisariaqanngilaa. Naak pinngitsaalisaallutik katitinneqarnikuugaluarlutik. Malik Berthelsenilli innuttaasut piumasaat isummerfigisariaqarpaa.
- Naammagittaattoqarnera (atsiortitsiortorneq, aaqq.) soorunami borgmesteritut suligaanni ernumanartutut tigusariaqarpoq. Taamaammat innuttaasut ernumassutaat tusarnaarneqartariaqarput ajornartorsiutaallu iluarsiivigineqarsinnaanersut misissorlugu. Tassa pisumut atatillugu iliuusissaq pitsaasoq.
Aatsaammi taanna oqallisaalinngilaq. Tusaanngitsuusaaginnarneqarsinnaanerpa?
- Naamik. Innuttaasut naammaginninnginnerat ernumassutaallu ilumoorullugit iliuuseqarfigineqartariaqarput: Soq-una, taama amerlatigisut kommunitssinnit anerusuttut?
Kommunalbestyrelsep qanoq atsiortitsiortorneq naliliiffigissaneraa innuttaasullu naammaginninngitsut qanoq iliuuseqarluni naammaginnilersinnissaat anguneqarsinnaanersoq piffissap takutikkumaarpaa. Kisianni Maniitsup avissaarsinnaata qanittukkut pinissaa ilisimatusartup ilisimaginngilaa.
