Kommunalbestyrelsimi isumaqatigiittut: Nanortalimmi innuttaasunut taasititsisoqassaaq

Kommune Kujallermi kommunalbestyrelsip Nanortallip kommunimit avissaarsinnaaneranik pingasunngornermi oqaluuserinnikkamik misigissutsit annertupput.

Siumumit kommunalbestyrelsimut ilaasortaq, Simon Simonsen oqarpoq: 

- Tassa siuliani oqarnittut immaqa misigissutsigut aallaavigalugit pisimasut aallaavigalugit oqallinneq aallartippoq, taanna oqarpoq.

Siunnersuuteqarniartumullu tamarmi ajunngitsumik inerneqarpoq.

- Tassa isumaqarpunga ajunngivissumik ataatsimiinnerput ingerlasoq, aamma isumaqarpunga nuannaarutigisariaqarlugu kommunalbestyrelsip tamarmiusup ataatsimoorluni Nanortalimmi taasititsisoqarnissaa kommuninngornissamut akuersissutigineqarmat, Simon Simonsen oqarpoq.

Tapersiisoqangaatsiartoq

Nanortalimmi eqqaanilu nunaqarfinni piffissami kingullermi atsiornernik katersititsisoqarpoq. Amerlasuullu kommunimit avissaarnissartik kissaatigaat.

- Innuttaasut (Nanortalimmi eqqaanilu nunaqarfinni aaqq.) qinersisinnaatitaasut 83 procentii taasititsisoqarnissaanik kissaateqarlutik atsiorsimasut paasineqarpoq.

Aningaasaqarnermut ataatsimiititaliaq taasititsisoqarnissaanut siunnersuummut akerlileereersimasoq oqaatigineqarnera ataatsimiinnermi naqisimanartoqarneranut pissutaasut ilagaat. Uppernarsarsinnaanngisamillu tunngaviginiarneqartoq peeqqaartariaqarsimasoq, Simon Simonsen oqarpoq:

- Tamannami ilumuunngilaq. Naalakkersuisunit misissuinerit ingerlanneqartut immaqa utaqqineqarsinnaasut innersuussutiginikuuarput, taanna oqarpoq.

Nunatsinni tamarmi innuttaasut ilorrisimaarnerannik misissuisoqarpoq. Taanna nunamut imminermut naalakkersuisumit, Jess Svanemit (S) aallartinneqarsimavoq. Misissuinermi kommunit kattunnerat inuillu ataasiakkaat sunniteqarsinnaanerat ukkatarineqarpoq, tassami illoqarfiup eqqanilu nunaqarfiit kommuniminit avissaarniarnerat siulliunngilaq.

Kingullermik siorna maajimi Maniitsoq Qeqqata Kommunianit ilaarusukkunnaarpoq.

Tunumi Kommuneqarfik Sermersuumit avissaarnissaq aamma oqallisigineqallattaasarpoq.

Innuttaasunut taasititsisoqassasoq

Atsiornernerpassuit tunngavigalugit misissuineq utaqqeqqaarnagu taasititsisoqarnissaa aalajangerneqarpoq.

- Taasititsisoqarnissaanut piareersaanerit maanna aallartinneqassapput, taama tamanna qanoq sivisutigissanersoq qaqugulu taasititsisoqarumaarnersoq takussavarput, Simon Simonsen oqarpoq.

Anders Olsen Siumumeersoq kommunalbestyrelsimi siunnersuuteqartuuvoq, taassumalu aasaanerani sulinngiffeqartoqalinnginnerani taasititsisoqarumaartoq neriuutigaa.