Silaannarsuarmi namminersortutut angalaarneq naammassilluarpoq
Ameerikkarmiu aningaasaatilissuaq Jared Isaacman SpaceXimi angalanermi Polaris Dawnimi ilaareerluni nunarsuarmut ajorani nunnippoq.
Ullaaq sapaammi Floridap avataani Isaacman allallu pingasut ilagalugit nunnipput.
Taama allappoq nutaarsiassaqartitsivik AFP.
Inuinnartut silaannarsuarmi angalaartutut tassa Isaacman imminut taasinnaanngorpoq.
Inuinnartut angalaneq piinnarnagu aamma tassa silaannarsualiartaammik ingerlatsisut tassaapput 1972-imili aatsaat taamak ungasitsisigusumut silaannarsuarmut angalasut - 1972-imi Apollo ingerlanneqartarallarmat qaammammuliarneq kingulleq pivoq.
Silaannarsualiarnermi 1400 km-rinik angalasoqarpoq. Taamaasilluni Nunarsuarmioqatigiit Silaannarsuarmi Uninngaviannit nunarsuarmut pingasoriaammik ungasinnerusumippuut.
Silaannarsuarmi atisassat misilerarneqaarput
Jared Isaacman ilaasullu allat marlunngormat igeriunneqarput sisamanngormallu tassa silaannarsualiartaammit anilluni silaannarsuarmi angalaarpoq.
Silaannarsualiartitsisartut SpaceX-imiit toqqaannartumik allakaatitsinermi Isaacman majuartarfikkut qummukartoq takuneqarsinnaavoq, taamaaliorlunilu silaannarsualiartaatip avataanukarluni - tassa nunarsuarmiit 700 km-iterimik ungasitsigisumi.
SpaceX-imiit silaannarsuarmiinnermi atisagassaq misilerarpaa, taannalu atorlugu angalaarluni. 10 minutsit sinnilaarlugit angallatip avataaniippoq.
Silaannarsuarmi angalaarnerup saniatigut ilisimatuussutsikkut misileraanerit 40-t misaaniittut silaannarsualiartaammi ingerlanneqarput.
Ilaatigut puaat assiliiveeqqanik misissorneqarput taamaalillunilu paasiniarneqarluni sivisuumik silaannarsuarmiinnerup peqqissutsimut sunniutigisai.
Jared Isaacman SpaceX-imik ingerlatseqateqarluni Polarisimik suliniummik aqutsisuuvoq, SpaceX Elon Muskimik pigineqarpoq.
Silaannarsuarmut angalaqatigiit sapaatiummat unnuaq 03:37 Floridap avataani nunnipput. Nunninnerannut piareersimasoqarpoq, taakkulu imaaniit angalasut ikiorpaat.
/ritzau/
