Nuummi uuliakoorneq unissimagunarpoq
Pingasunngornikkut ullaakkut Nuummi pineqaatissinneqartunut isertitsiviup eqqaani uuliakoornermik maluginnittoqarpoq.
Tamassuma kingorna politiit paasiniarpaat uulia kuuttoq suminngaanneernersoq, tamaannerani qatserisartut uuliamik siaruarnaveeqqusiillutik liiterinik tusintilippassuarnik milluaasitsipput.
-Uuliakoornermut aallaaviusoq suli sumiissusersineqanngilaq, ilimagaarpulli aniasoorneq unissimassasoq Jeppe Andsager, Kalaallit Nunaata politiianeersoq ullumi sapaammi oqaluttuarpoq.
Uuliakoorneq unissimagunaraluartoq suli imaani uuliaqarpoq.
Politiit oqaasii malillugit uuliaqarnera suli pissuteqarpoq tininnermi uuuliap sissamiilersimasup ulinnerani immamut siaruaqqittarnerigaa.
-Siaruarfiani siaruaanaveeqqusersuisoqartpq Jeppe Andsager oqarpoq.
Unissimaneranik upperinninnersi qanoq tunngavilersorpisiuk?
-Maanna imaani uulia minnerujussuanngorpoq. Taava tinittarnerinik ulittarnerinillu ullorsiutini qangalu uuliakoorneq paasineqarsimasoq katikkaanni taava paasiuminarpoq tininnerani imaani takussaaqqilersartoq Jeppe Andsager nassuiaavoq.
Avatangiisinut sunniutaasussat ilisimaneqanngillat
Pingasunngormalli imaaniit qatserisartut uuliamik literinik tusindtilikkaamik milluasitsisimapput.
Sisamanngormat qatserisartuni indsatslederi Jens Dahl oqaluttuarpoq Nuummi pineqaatissinneqartunut isertitsiviup avataani uulia 9.000 literi milluartissimallugu
-Suliap erloqinassusianik 1-miit 10-mut uuttuusersuissagutta, taava 8-9 missaaniippoq sisamanngormat Jens Dahl oqarpoq.
Avatangiisinut Naalakkersuisoqarfiup politiinut ilisimatitsissutigaa imaani nalunnguarneq uloriananngitsoq. Aalisakkanilli uuliarsunnitsunik nerisoqannginnissaa kaammattuutigalugu.
Politiit ilisimatitsipput maannangaaq avatangiisinut sunniutaasut ilisimaneqanngitsut:
Ulluni tulliuttuni misissuinerit politiinit ingerlateqqinneqassapput.
- paasisitsisinnaasut suli misissorpagut Jeppe Andsager Kalaallit NUnaata politiivineersoq oqarpoq.
