Efterskolemi oquttumi ukioq atuarfiusoq nutaaq: Init marluk parnaaqqajuaannarput

Jens Gustav Levisen nipilersornermik ilaatigut ilinniartitsisuusoq Maniitsumi Efterskolemi angalaarussivoq.

Efterskolit allat amerlasuut assigalugit atuartut eqimattanngorlutik oqaloqatigeerujoorput. Ilaat nallukattaapput ilaallu inimi ataatsimoortarfimmi nerrivimmi arsaararlutik.

Atuartorlu ataaseq guitarilerivoq.

Maniitsumili efterskolemi atuarfiusoq una allatulli inngilaq.

Jens Gustav Levisenip inersuakkoorluni angalaarussivoq, atuartitsiviillu ilaannut ‘lokale 1’-mi matuani allassimasulimmut ingerlalluni.

- Atuartitsinissamut atorsinnaajunnaagarput. Oquttortaqarnera pissutaalluni, taanna oqarpoq.

Atuarfimmi atuartitsiviit marluk atorneqarsinnaanngillat parnaaqqajuaannartinneqarlutillu. Jens Gustav Levisen efterskolimi ilaatigut nipilersornermik ilinniartitsoq angalaarussivoq. Assi © : Paalu Møller / KNR

Taamaammat ini piffissami matumani parnaaqqajuaannarpoq.

Jens Gustav Levisenip matu ammarpaa inillu imaqanngitsut tullianut iserluni.

- Ammalaarluguluunniit malunnarpoq silaannaa peqqinnanngitsoq, taanna oqarpoq.

Lokale 1-p saniatigut atuartitsivik alla aamma parnaaqqavoq.

Atuartut allami sinittartut

Atuartitsiviilli marluinnaat oqummik eqqugaasimanngillat.

Atuarfik maajimi - misilitsiffiup nalaani atuartut ineqarfiat oqoqartoq paasineqarmat atuarfik atuartuerutsinneqarpoq.

Efterskolimi atuartut arlallit taamani angerlarput.

Atuartut nutaat 39-t maanna allartipput.

Pissutsit nalinginnaaneranni efterskolimi atuartut 60-70-it tungaannut inissaqartarsimagaluarput. Atuartulli ineqarfiata atorsinnaannginnerani atuarfiup inissat killilertariaqarsimavai.

Atuartut ineqarfianni angisuumi atuartut namminneq ineeraqarfigisarsimasaanni maanna najugaqartoqanngilaq. Assi © : Paalu Møller / KNR

- Efterskolimi atuartut ineqarfiat atorsinnaajunnaarparput. Taamaammat Majoriap ilinniartunut ineqarfiat atorsinnaanerlutigu ilinniartitaanermut naalakkersuisoqarfimmut saaffiginnippugut, efterskolimi forstanderi, Vilhelm Josefsen, oqarpoq.

Efterskolilu taamaaliornissamut akuerineqarpoq.

Atuartut 33-t sineriammeersut tassani siniffissaqartinneqarput. Atuartullu sinnerli Maniitsuminngaanniinngikkunik illoqarfimmi najugaqarfigisinnaasaminnik ilaqutaqarput.

Nutarterinissaq utaqqisaasoq

Naallu forstanderip oqarnera naapertorlugu atuarfimmi atuartitsiviit marluk oquttut aaqqinneqangajaleraluartut efterskolimi atuartut ineqarfiat suneqassanersoq suli nalunarpoq.

- Aaliangerniagassaagami qanoq suliaritissanersoq. Imaluunniit isatissanersoq tamaat. Immaqaluunniit nutaarluinnarmik pisaartoqassanersoq, Vilhelm Josefsen oqarpoq.

Qanorli pisoqassagaluarpalluunniit tamanna sivisussaaq.

- Nutarterisoqassagaluarpat, isateriarlugu nutaamik sanasoqassagaluarpat ukiut marluk-pingasut iluanni suliarineqassasoq, Vilhelm Josefsen siulittuivoq, nangillunilu:

- Nutaarluinnarmik sanasoqassaguni aamma ukiut marluk-sisamat tungaanulluunniit immaqa sanaartortoqassaaq.