Kinguaassiorsinnaanermut nakorsartinneq: Kiisami aallartippoq
![](/sites/default/files/styles/image_934x467/public/2024-08/20240126-103041-4-6048x3789ma.jpg?itok=WA21uiyr)
- Sulinitsinni ilitsersuutit naleqqussareeratsigit, Rigshospitalemilu nakorsartissinnaanissamut inissaqalermat nakorsartittussat siulliit innersuuppagut, qanittukkut aallarsinnaassasut naatsorsuutigaarput.
Dronning Ingridip peqqissaaviani nakorsat pisortaat Aviaja Siegstad oqarpoq.
Piumassuserinngisamik kinguaassiorsinnaanngitsut Danmarkimut katsorsartikkiartortarnissaat ukioq kingulleq novembarimili utaqqinikuullugu nakorsaq oqiliallassimaqisoq oqarpoq.
Suliaq peqqinnissaqarfimmut oqitsuinnaasimanngilaq. Politikkikkullu suliat tukassimapput.
Naalakkersuisut ukioq kingulleq aningaasanut inatsisissami 8,7 millionit koruunit immikkoortissallugit saqqummiuppaat, aningaasanullu inatsit saqqummiunneqarmat aningaasat piiginnarneqarsimapput.
Aningaasat piiginnarneqarsimanerat pillugu nassuiaasoqarusussimanngilaq, nassuiaateqarfigineqarnikuunanilu.
Naalakkersuisut aningaasat piiginnarneqarsimasut, apriilimi naneqqippai, aningaasat taakku piumassuserinngisamik kinguaassiorsinnaanngitsunut nunatsinniit Danmarkimut angalanermut, ineqarnermut, katsorsartinnermullu atorneqartussaapput.
- Iluatsilluassappat 2025-mi aningaasaqarnermut inatsimmut ilanngunneqaqqissapput, Peqqissutsimut Naalakkersuisoq Agathe Fontain (IA) KNR-imut taamani oqarpoq.
Massakkut – aningaasat qulakkeerneqareerlutik qaammatit sisamat ingerlareersut, katsorsartittussat utaqqeqqissanngillat neriuinnassanngillallu.
Nakorsat pisortaata Aviaja Siegstadip naatsorsuutigaa qaammatip tulliani katsorsartittussat siulliit Danmarkimut aallarsinnaassasut.
- Taanna qularinngilara, nakorsat pisortaat oqarpoq nangillunilu:
- Isumaqatigiinnikuuvugut ukiup sinnerani qaammatit tamaasa aallartoqartassasoq.
Katsorsartittussammi sinneri?
Aviaja Siegstad nuannaarpoq, peqqissaavimmi piareersaatit suliassallu kiisami inissammata, suliarli kigaassimanerarlugu oqaatigaa.
- Piumassuserinngisaminnik kinguaassiorsinnaanngitsunut nakorsatittoqarsinnaaneq periarfissaalermat nuanneqaaq, nakorsiammi innersuussinnaanagit issiaqatigisarnikuuakka, katsorsartinnissamut innersuussisinnaaneq kiisami iluatsippoq. Politikkikkullu piumassuseqarluartoqarmat aappariit piumassuserinngisamik kinguaassiorsinnaangitsut ikiorserneqarnissaannut.
Qulit maannnamut innersuunneqarnikuupput, Aviaja Siegstad oqaluttuarpoq.
- Qulit taakku, innersuussagut amerlatinniarsarinikuuagut, qulakkeerniarlugu katsorsaanerit sukkanerpaamik aallartinniassammata – pisinnaanngitsunik ilaqarsinnaammat, aallarsinnaasunik piareersimasuutitaqarniassagatta, taanna oqarpoq.
- Nakorsartikkusuttut misissugassat sinneri allattorsimasuutigivagut.
Nakorsat pisortaat naapertorlugu 20-t innersuunneqarnissaminnut utaqqisuniipput.
Aappariit aappaagu nakorsartikkusuttut isumalluarsinnaappat?
- Ukioq manna – isumaqatigiissut naapertorlugu (Rigshospitalemut red.) – appariit qulit nakorsatissinnaassasut, amerlanerusinnaanngillat, Aviaja Siegstad akivoq.
Katsorsarneqartussat tullii ukiup naajartuaarnerani innersuunneqarnissaat pilersaarutaavoq. Taakkulu 2025-mi Danmarkimut nakorsartikkiartorsinnaassasut naatsorsuutigaa.
Peqqissutsimut naalakkersuisup Agathe Fontainip (IA) siuliani misiliutitut oqaatiginikuugaluaraa nakorsat pisortaat Aviaja Siegstad isumalluarpoq:
- Nakorsartissinnaaneq ingerlaqqinnissaanut politikkikkut piumassuseqarluartoqarmat nakorsartissinnaaneq ingerlaqqissasoq naatsorsuutigaara,isumaqatigiissummik suliaqartoqarumaartoq, taanna oqarpoq.
Piumassuserinngisamik kinguaasiorsinnaanngitsut Danmarkimi nakorsartissinnaanissaat aningaasammut inatsimmut ilannguteqqinneqassanersut KNR-ip akissutissarsiniarlugu Ilaqutariinnermut Peqqissutsimullu Ataatsimiititaliami ilaasortat, Peqqissutsimut Naalakkersuisoq Agathe Fontain attavigeqarfiginikuuaai.