Agathe Fontainip kinguuaassiorsinnaanngitsunut millionilinnik aaqqiineq "misiliutaaneraraa"

Naak angajoqqaat qitornaqanngitsut ikiorneqarnissaannut aningaasanik immikkoortitisoqartoq naalakkersuisut siorna tulluusimaarlutik oqaatigigaluaraat aningaasanut inatsit naammassilluni piareermat aningaasat tammarataarput.

Naalakkersuisuni arlaannaataluunniit sooq taamaattoqarnersoq nassuiaatigisinnaanngilaat.

Maannali peqqinnissamut naalakkersuisup, Agathe Fontainip (IA) IVF-imik ICSI-millu Danmarkimi ukiup sinnerani katsorsaanissamut 3 millionit koruuninik nassaartoqartoq oqaatigaa. Katsorsaaneq taanna reagensglasimik atuilluni katsorsaaneruvoq nunatsinni katsorsaatigineqarsinnaanngitsoq.

Ukiumit ataatsimit sivisunerunissaa neriuutigigaa

Tamannali misiliutaannaavoq.

- Eqquinissaq siunertaanikuunngilaq. Taamaammat periarfissaqartoq maanna nuannaarlunga nalunaarutigisinnaavara, taanna KNR-imut oqarpoq.

- Pisariaqartikkatsigu misileeqqaartariaqaratta, qanoq ingerlava, arlaatigut sunik aporfeqarpa? Tamakkortai misissorluartariaqaratsigit taamaammat ukiormanna misileraanertut ingerlanniarparput.

Aningaasallu ukiumit ataatsimit sivisunerusumut qulakkeerneqarsinnaanissaat neriuutigaa.

- Ujarlerpugut, ujarlernitsinni peqqinnissaqarfiup iluani affai nassaarisinnaariarlugit affai sillimmatininngaanniit taakkuninnga matussuserneqarsinnaapput.

Nakorsaaneq utaqqisut avaqqussinnaanissaannut isumaqatigiissusiorsimasoq

Danmarkimi IVF-imik ICSI-millu katsorsaanissamut 8,7 millionit koruunit immikkoortinneqarsimasut Naalakkersuisut siorna aggustimi nalunaarutigaat.

Aningaasalli ukioq manna januaarimi tammariataarsimapput. Naalakkersuisup, Erik Jensenip (Siumut) imaluunniit Agathe Fontainip aningaasat sooq aningaasanut inatsimmi ilaajunnaariataarsimanersut nassuiaatigisinnaanngilaat.

Tallimanngormallu ualikkut tusagassiuutinut nalunaaruteqartoqarpoq. Tassani 3 millionit koruunit - nassaarineqaqqittut regensglasilu atorlugu nakorsaasoqarnissaanut immikkoortinneqartut allassimavoq. Agathe Fontainillu kalaallit angajoqqaat maanna erngertumik ikiorneqarnissaannut iliuuseqarniarluni oqarpoq.

- Nakorsaaneq rigshospitalimut isumaqatigiissusiornikuuvoq Danmarkimi utaqqisut avaqqullugit uagut aallartissinnaasagut taakkua utaqqisunut ilaanatik ingerlaannaq passunneqarsinnaanerannut isumaqatigiissusiorsimagamik qujanaavissumik, taanna oqarpoq.

Aappariit qanoq amerlatigisut neqeroorummik atuisinnaanissaat qularnarpoq. Agathe Fontainip oqarnera naapertorlugu peqqinnissaqarfiup kinguaassiorsinnaanngitsunut neqeroorummik, nakorsaanermut, nakorsaatinut, angalanermut najugaqarnermullu aningaasartuutinik tamanik peqqinnissaqarfiup nammineq akiligassaqarfigisaanik neqerooruteqarnikuunnginnera pissutaavoq. 

Kikkut katsornarneqarsinnaappat?

Aappariit ukioq ataaseq sinnerlugu najugaqatigiissimasut ataatsimullu meeraqanngitsut misissorneqarlutillu kinguaassiorsinnaannginnermut katsorsarneqarsinnaassapput. Nakorsaq arnap 38-nik ukioqarluni ukiukinnerulluniluunniit innersuunneqarsimaneranit 40-liinissata tungaanut nakorsaanermik aallartitsisinnaavoq.

Aappariit Danmarkimukarlutik katsorsartikkiartornissaannut pingasunik neqeroorfigineqassapput.

Agathe Fontainip oqarnera naapertorlugu pisariaqartitsineq annerusoq paasineqassappat ukioq manna aningaasanik amerlanerusunik pissarsiassaqartoqarpoq. Ukioq mannamummi 5,7 millionit koruunit tassunga periarfissatut inissinneqarsimapput.

Aningaasat taakku marluk katikkaanni taava siorna aggustimi neriorsuutigineqartutulli 8,7 millionit koruuniupput.