Maannguaq meerartaarusuppoq – sulili qilanaarusuppallaanngilaq

Nunatsinni nammineq piumassuserinngisaminnik kinguaassiorsinnaanngitsunut qaammatit kingulliit sivisullutillu paatsuunganarput.

Kinguaassiorsinnaanngitsut ikiorserneqartalernissaannut aningaasaliinissaq Naalakkersuisunit neriarsuutigineqareersoq aningaasaliissutit tammaaneqariasaarput. Peqqissutsimullu naalakkersuisoq, Agathe Fontain (IA) tallimanngormat nalunaaruteqariasaarpoq: IVF-imik ikiuinissamut 3 millionit koruunit nunatta karsiani nassaarineqarput.

- Pingaaruteqartorujussuuvoq aamma isumaqartorujussuuvoq, Maannguaq Birch oqarpoq.

Tassuma aappani Gerti ukiuni 15-ini aapparaa, taakkulu ukiuni arlalinni meerartaarniartarsimapput.

- Nuannaaqaanga soorunami. Aamma eqqarsaatigalugu sineriammiittut uagutsitullu aqqusaagaqartut eqqarsaatigalugit nuannaaqaanga, taanna KNR-imut oqarpoq.

Naalakkersuisut aningaasanut inatsisissatut siunnersuutertik siorna aggustimi saqqummiuppaa. Tassanilu kinguaassiorsinnaanngitsut Danmarkimi ikiorserneqarnissaannut 8,7 millionit korunnit immikkoortinneqarsimapput. Januaarimili aningaasat taakku tammaqqeriataarsimapput. Tamannalu sooq taamaannersoq Agathe Fontainip aningaasaqarnermulluunniit naalakkersuisup, Erik Jensenip (Siumut) nassuiaateqarfigisinnaanngilaat. Taakku aningaasat nassaareqqinneqassasut neriorsuutigaat. Neriorsuut maanna piviusunngorpoq.

Ingerlanera qularnartoq

Taamaakkaluartorli Maannguaq Birchip aappaatalu tamanna uppererpianngilaat. Ingerlanneqarneratami nalunarnera taakkununnga qulalersitsivoq.

Maannguaq Birchili naartulersinnaannginnami Nuummi Dronning Ingridip Napparsimmavissuani misissortissimavoq, tassanilu nammineq ilumini ajoquteqarani naartulernissaanut periarfissakitsoq paasitinneqarpoq. Aappariit taamaattumik naartunissamut ikiuutaasartumik Dronning Ingridip Napparsimavissuani neqeroorutaasartoq ukiuni tulliini misilikkaluarpaat iluatsinngitsumilli. 

Politikerilli kinguaassiorsinnaanngitsut peqqinnissaqarfiup akiligaanik Danmarkimi IVF-imik ICSI-millu nakorsaasarneq 2019-imi unitsippaat. Taamani inuit angalaneq najugaqarnerlu nammineq taamaallaat akilertartussaavaat. Nunatsinnili kikkut tamarmik assigiimmik nakorsarneqannginnerat tunngavilersuutigineqarluni ikiuineq tamanna unitsinneqarpoq.

Suli 5,7 millionit

Aningaasanut inatsisissatut siunnersuut 2024-mi saqqummiunneqarmat angalanermut, najugaqarnermut misissortinnermut katsortinnermullu aningaasartuutit tamarmik peqqinnissaqarfiup akiligassarissagai saqqummiunneqarpoq.

- Ataasiinnarmik ingerlaffeqanngimmat, unillutik, taamaattoqarpoq. Nå utaqqeqqissaagunngooq. Taakkua soorunami kamannarpoq. Taavalu naalliunnarluni utaqqisuulluni.

- Piffissaq sivisooq ingerlagami taamatut taavalu tusagaqassanata. Attaveqartaraluarpunga naalakkersuisoqarfimmut akissuteqaannartarput; tassa utaqqivugut. Soorunami misigissutsinut aamma aalassatsitsisarpoq.

Kinguaassiorneq ajuleqqasut ikiorserneqartussat ukioq manna ilimagisamit amerlanerussappata, siunertamut aningaasaliissutit 5,7 millionit koruuninit ilaneqarsinnaasut aamma aalajangiunneqarpoq.